Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 350 Hüküm no: 428 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultanhamamı’nda dellâke olan Safiye’yi öldüren Cebeci İbrahim aleyhine azatlısı Ayşe’nin açtığı davanın sulhla sonuçlandığı Sulh. Mahmiye-i İstanbul’da Sultanhamamı’nda dellâke iken târih-i kitâbdan üç sene mukaddem ber-vech-i âtî katîle idiği müte‘ayyin olan Safiye bt. Abdullah b. Abdurrahman’ın verâseti zevc-i metrûkü gāib ani’l-meclis Mustafa b. Abdullah ile kendiyi i‘tâk eden mahmiye-i mezbûrede Hoca Hayreddin mahallesinde sâkine Âişe bt. Ahmed nâm hatuna münhasıra olduğu lede’ş-şer‘i’l-enver mütehakkık oldukdan sonra zâtı Mustafa Efendi b. Mehmed ve Mehmed Beşe b. Mustafa ta‘rîfleriyle mu‘arrefe olan mezbûre Âişe Hatun meclis-i şer‘-i şerîfde bâ‘isü hâze’l-kitâb Nâtır Cebeci İbrahim Beşe b. İshak nâm kimesne mahzarında ikrâr ve takrîr-i kelâm edip mezbûr Cebeci İbrahim Beşe târih-i mezkûrda atîkam mezbûrenin başına tokmak ile bi-gayr-ı hakkın darb ve katl ve boynundan ve elli üç zencîrli altınını ve otuz guruş kıymetli mücevher kuşağını ve yüz yirmi guruş kıymetli bir çift altın bileziğini ahz u kabz etmişidi deyü mûceb-i şer‘îsini ve eşyâ-i mezkûreden nısf hisse-i irsiyemi taleb ve da‘vâya mezbûr İbrahim Beşe üzerine şürû‘ eylediğimde ol dahi husûs-ı mezkûru bi’l-külliye inkâr etmeğin ba‘de vukū‘ı’l-münâza‘a beynimize muslihûn tavassut edip da‘vâ-yı mezkûremden beni mezbûr İbrahim Beşe ile an-inkâr on sekiz guruş üzerine sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr on sekiz guruşu mezbûr İbrahim Beşe yedinden tamamen ahz u kabz eylediğimden sonra husûs-ı mezkûra müte‘allika âmme-i de‘âvî ve mutâlebât ve eymân ve muhâsamâtdan mezbûr Cebeci İbrahim Beşe’yi ibrâ-i âmm-ı râfi‘u’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 Muharrem sene [1]144. Şuhûdü’l-hâl: İbrahim Beşe b. Hasan, Salih Beşe b. Osman, Du‘âcı Molla İbrahim b. Mustafa, Mehmed Çelebi b. Abdullah.