Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 351 Hüküm no: 429 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah ile Seyyid Ali Efendi’nin muhâlaa yoluyla boşandıkları Muhâla‘a. Mahmiye-i İstanbul’da Küçük Ayasofya Câmi‘-i şerîfi kurbünde Hüseyin Ağa mahallesinde sâkine Âişe bt. Abdullah b. Abdurrahman nâm hatun tarafından husûs-ı âti’z-zikri ikrâra vekîl olduğu zâtını ma‘rifet-i şer‘iye ile ârifân el-Hâc Ali b. Osman ve Abdullah Çelebi b. Mehmed şehâdetleriyle sâbit olan İmâm Mustafa Efendi b. eş-Şeyh Abdüllatif nâm kimesne meclis-i şer‘-i hatîr-i lâzımü’t-tevkīrde bâ‘isü’l-kitâb es-Seyyid Ali Efendi b. es-Seyyid Mehmed nâm kimesne mahzarında bi’l-vekâle ikrâr ve takrîr-i kelâm edip mezbûr es-Seyyid Ali Efendi müvekkile-i mezbûrenin zevci olup beynlerinde hüsn-i mu‘âşeretleri olmamağla zimmetinde mütekarrir ve ma‘kūdün-aleyh dört bin akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzere zevci mezbûr ile muhâla‘a-i sahîha-i şer‘iye ile muhâla‘a olduğunda ol dahi hul‘-ı mezbûru ber-vech-i muharrer kabûl eylediğinden sonra hukūk-ı zevciyete müte‘allika âmme-i da‘vâdan her biri âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Muharremi’l-harâm sene [1]144. Şuhûdü’l-hâl: eş-Şeyh es-Seyyid Veliyyüdin Efendi, Mustafa Efendi b. Osman efendi el-kayyûm bi-Câmi‘i Ayasofya-i kebîr, es-Seyyid Ali Çelebi b. Mehmed, Ali Dede sâkin-i tekye-i Mehmed Paşa, el-Hâc Süleyman b. Mehmed, Molla İvaz b. Mehmed.