Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 351 Hüküm no: 430 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saruhan sancağı Kabaağaç zeameti mutasarrıfı Ahmed Ağa’nın küçük oğlu Mustafa için İsmaili Ağa’dan satın alınan zeamet hissesi hususundaki davada anlaşma sağlandığı Mahmiye-i İstanbul’da Kabasakal mahallesinde Sultan odalarında sâkine Rukiye bt. Abdullah b. Abdülmennan’ın vâlidesi olup ber-vech-i âtî iddi‘â-yı vekâlet eden Âişe Hatun bt. İsmail meclis-i şer‘-i şerîf-i enverde râfi‘u’l-kitâb İsmail Ağa b. Mehmed mahzarında üzerine da‘vâ ve takrîr-i kelâm edip kızım mezbûrenin zevci Ahmed Ağa hayatında Saruhan Sancağı’nda Kabaağaç nâm karye ve gayruhû ze‘âmetine mutasarrıf iken vefât ettikde ze‘âmet-i merkūmun tasarrufu sulbî oğlu Mustafa’ya ve nısf-ı âharı merkūm İsmail Ağa’ya taraf-ı Devlet-i aliyye’den tevcîh ve sadaka ve ihsân buyruldukda merkūm İsmail Ağa hissesini mezbûr Ahmed Ağa’nın firâşından hâsıl kızım mezbûre Rukiye’den mütevellid sagīr-i merkūm Mustafa’ya ferâgat ve kasr-ı yed etmek üzere kızım mezbûre Rukiye kendi mâlından merkūm İsmail Ağa’ya bi-tarîkı’r-rüşve yedi yüz elli guruş teslîm ol dahi yedinden kabz ve tesellüm edip ze‘âmet-i merkūmeyi ferâgat ve kasr-ı yed ettikden sonra sagīr-i merkūm Mustafa ze‘âmet-i merkūmeyi zabta müyesser olmadın fevt olup kızım mezbûre merkūm İsmail Ağa’ya bi-tarîkı’r-rüşve medfû‘u olan meblağ-ı mezbûr yedi yüz elli guruşu istifâ etmemekle merkūm İsmail Ağa’dan taleb ve da‘vâ ve ahz u kabz ve lede’l-iktizâ sulh ve ibrâya tarafından beni vekîl ve nâib-i menâb nasb ve ta‘yîn ettikde ben dahi vekâlet-i merkūmeyi kabûl etmemle merkūm İsmail Ağa’dan meblağ-ı merkūmu bi’l-vekâle taleb ve da‘vâ eylediğimde beynimize muslihûn tavassut edip da‘vâ-yı mezkûremden merkūm İsmail Ağa ile beni üç yüz altmış guruş üzerine sulh ettiklerinde ben dahi bi’l-vekâle sulh-ı mezbûru kabûl etmişidim. Binâen-aleyh bedel-i sulh-ı mezbûru merkūm İsmail Ağa’dan bi’l-vekâle taleb eylediğimde edâdan imtinâ‘ eder suâl olunup edâsıyla tenbîh olunmak murâdımdır dedikde gıbbe’s-suâl merkūm İsmail Ağa cevâbında fi’l-vâki‘ hâl merkūme Âişe Hatun’un takrîr-i meşrûhu üzere olup bi’l-vekâle da‘vâ-yı merkūmesinden üç yüz altmış guruş üzerine sulh olduğunu ikrâr lâkin câiz ki müvekkile-i merkūme Rukiye Hatun ba‘de zaman vâlidesi merkūme Âişe Hatun’un vekâletini inkâr edip meblağ-ı mezbûru benden tazmîn eder ve vekâletini isbât eylesin <> ma‘lûmum değildir deyü inkâr edicek müdde‘iye-i mezbûre Âişe Hatun’dan ber-vech-i muharrer müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahalle-i mezbûre ahâlîsinden zât-ı mezbûreyi bi’l-ma‘rifeti’ş-şer‘iye ârifân Halil Çelebi b. Mustafa ve Mehmed Çelebi b. Şa‘ban nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mahalle-i mezbûrede Sultan odalarında sâkine Rukiye bt. Abdullah b. Abdülmennan merkūm İsmail Ağa’ya Saruhan Sancağı’nda Kabaağaç nâm karye ve gayruhû ze‘âmetinden hissesini sagīr oğlu Mustafa’ya ferâgat husûsiʼçün bi-tarîkı’r-rüşve <> medfû‘u olan yedi yüz elli guruşu merkūm İsmail Ağa’dan taleb ve da‘vâ ve ahz u kabza ve lede’l-iktizâ sulh ve ibrâya vâlidesi işbu Âişe Hatun’u bizim huzûrumuzda vekîl ve nâib-i menâb nasb ve ta‘yîn edip merkūme Âişe dahi vekâleti merkūmeyi kabûl etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde gıbbe[88a]’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh merkūme Âişe Hatun meclis-i şer‘de merkūm İsmail Ağa mahzarında takrîr-i kelâm edip ânifen edâsına hükm ve tenbîh olunan üç yüz altmış guruşu merkūm İsmail Ağa bana tamamen edâ ve teslîm ben dahi bi’l-vekâle ahz u kabz edip mâ‘adâya müte‘allika da‘vâdan merkūm İsmail Ağa’nın zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 Muharrem sene [1]144. Şuhûdü’l-hâl: Ali Ağa b. Ali, Abdullah Efendi b. Abdullah, Berber Mehmed Çelebi b. Abdullah, Derzi Ahmed Çelebi b. Mustafa. Hüseyin Bey b. Mehmed, Derzi Osman Çelebi, Süleyman b. Abdullah.