Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 353 Hüküm no: 431 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karakelle Zâim Mehmed Ağa’nın Kayacık zeametini iltizama alan Muhzırbaşı Mehmed Ağa’nın borcunu ödediği Mahmiye-i İstanbul’da Mi‘mâr Ayas mahallesi ahâlîsinden Karakelle demekle şehîr Za‘îm Mehmed Ağa b. Hasan b. Abdullah nâm kimesne tarafından kayınpederi ve husûs-ı âti’z-zikri taleb ve da‘vâ ve ahz u kabza vekîl olduğu Hüseyin b. Hasan ve Mustafa b. Mehmed şehâdetleriyle sâbit olan Hâtemî Süleyman Efendi b. Abdurrahman nâm kimesne meclis-i şer‘-i şerîf-i enverde medîne-i Ayntab Muhzırbaşısı olan bâ‘isü hâze’l-kitâb Mehmed Ağa b. Cum‘a nâm kimesne mahzarında bi’l-vekâle üzerine da‘vâ ve takrîr-i kelâm edip dâmadım müvekkil-i mezbûr medîne-i mezkûrede vâki‘ bâ-berât-ı âlîşân tasarrufunda olan Kayacık ze‘âmeti karyelerinin a‘şâr-ı şer‘iye ve rüsûm-ı örfiyesini cem‘ ve tahsîl için bin yüz kırk iki senesinde vâki‘ Mart ibtidâsından bir sene tamamına değin dört yüz guruşa mezbûr Muhzırbaşı Mehmed Ağa’ya ilzâm eylediğinde ol dahi iltizâm ve kabûl mahsûlâtını cem‘ ve tahsîl ve makbûzâtından iki yüz guruşunu müvekkilim mezbûra def‘ ve teslîm ol dahi ba‘de’l-kabz bâkī kalan iki yüz guruşu bi’l-vekâle taleb ederim suâl olunsun dedikde gıbbe’s-suâl mezbûr Muhzırbaşı Mehmed Ağa cevâbında kazıyye minvâl-i muharrer üzere idiğini ba‘de’l-ikrâr ze‘âmet-i mezkûre mahsûlâtından ba‘de ihrâci’l-mesârif ancak üç yüz kırk guruş hâsıl ve meblağ-ı mezbûrdan vekîl-i mezbûr kabzını mu‘terif olduğu iki yüz guruşu kendiye ve yirmi guruşunu dahi bi-tarîkı’l-havâle hazır bi’l-meclis Halil Efendi’ye def‘ ve teslîm yedimde ancak yüz yirmi guruş bâkī kalmışdır deyü ikrâr ve i‘tirâf etmeğin mûcebince meblağ-ı bâkī-i mezbûr yüz yirmi guruşu vekîl-i mezbûr Süleyman Efendi’ye teslîme mezbûr Muhzırbaşı Mehmed Ağa’ya ba‘de’t-tenbîh vekîl-i mezbûr Süleyman Efendi meclis-i şer‘de ânifen edâsına tenbîh olunan meblağ-ı mezbûr yüz yirmi guruşa bi’l-emr ve’l-kabûl kefâlet-i sahîha-i şer‘iye ile kefîl olan işbu hazır bi’l-meclis Halil Efendi b. el-Hâc Ahmed nâm kimesne mahzarında ikrâr ve takrîr-i kelâm edip mezbûr Halil Efendi kefâlet-i mezkûresine binâen meblağ-ı mezbûr yüz yirmi guruşu bana edâ ve teslîm ben dahi yedinden bi’l-vekâle ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 Muharrem sene [1]144. Şuhûdü’l-hâl: Mehmed Çelebi b. Abdullah, diğer Mehmed Çelebi b. Abdullah, Salih Çelebi b. Süleyman.