Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 354 Hüküm no: 432 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Beşik’in Kayseri’nin Vekse köyünde bulunan bağını sattığı Mübâya‘a. Vilâyet-i Anadolu’da medîne-i Kayseriye kazâsına tâbi‘ Vekse nâm karye ahâlîsinden olup mahmiye-i İstanbul’da Atpazarı’nda müsâfiren sâkin Todori v. Beşik nâm Ermeni meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka Melkeşe v. Sava nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup karye-i mezbûre bağları hilâlinde vâki‘ bir tarafdan Süleyman Bey bağı ve bir tarafdan el-Hâc Hasan bağı ve bir tarafdan dere ve taraf-ı râbi‘i tarîk-ı âm ile mahdûd kürûmu mülk iki inbul? bağımı bi-cümleti’t-tevâbi‘ ve’l-levâhık tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile mesfûr Melkeşe zimmîye târih-i kitâbdan on altı ( ) mukaddem yetmiş sekiz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yetmiş sekiz guruşu mesfûr Melkeşe zimmî yedinden tamamen ahz u kabz eyledim. Fîmâ-ba‘d hudûd-ı mezkûr ile mahdûde olan bağda kat‘a alâka ve medhalim kalmayıp mesfûr Melkeşe zimmînin mülk-i müşterâsı ve hakk-ı sırfı olmuşdur. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Muharremi’l-harâm sene [1]144. Şuhûdü’l-hâl: Ali Beşe b. Abdullah, Kara Hasan b. Ahmed, Mehmed b. Abdullah, Kosta v. İsak, Mihal v. Kiryako, Vasil v. Bali, Anaştaş v. Yuvan, Zeynel v. Sava, Kiryako v. İstavri.