Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 305 Hüküm no: 437 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli b. Mustafa’nın ağaçlı arazideki kendi hissesini sattığı Vilâyet-i Anadolu’da Kostamonu sancağında Sart kazâsına tâbi‘ Himmetoğlu demekle ma‘rûf nâm karyede sâkin Veli b. Mustafa nâm kimesne meclis-i şer‘-i hatîrde işbu râfi‘u’l-kitâb Mehmed b. Süleyman mahzarında ikrâr ve takrîr-i kelâm edip karye-i mezbûre sınırı dâhilinde vâki‘ lede’l-ahâlî ma‘lûmü’l-hudûd olup tasarrufu babasından mezbûr Mehmed’e intikāl eden arâzide vâki‘ adedi beynimizde ilm-i şer‘î ile ma‘lûm olan eşcâr-ı müsmire ve gayr-ı müsmireden üç hisseden benim mülk-i mevrûsum olan bir hisse-i şâyi‘amı beş yüz fıddî râyic fi’l-vakt akçeye mezbûr Mehmed’e tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr beş yüz akçeyi merkūm Mehmed yedinden tamamen ahz u kabz eyleyip mebî‘-i mezbûru mahallinde kabza merkūm Mehmed’i taslît eyledim, min-ba‘d benim alâka ve medhalim kalmadı keyfe mâ yeşâ’ mutasarrıf olsun dedikde mukırr-ı mezbûru kelimât-ı meşrûhasından mezkûr Mehmed bi’l-muvâcehe tasdîk ve bi’l-müşâfehe tahkīk edicek mâ-vaka‘a bi’t-taleb ketb olundu. Hurrire fi’l-yevmi’s-sâbi‘ min-Şevvâli’l-mükerrem li-sene erba‘a ve sittin ve elf. Şuhûdü’l-hâl: Ahmed Efendi b. Yusuf, Rıdvan Bey b. Abdullah, Yusuf b. Sadi, Abdi Çelebi b. Ali, Osman b. Süleyman, Pîrî Beşe b. Hüseyin, Kara Halil b. Lütfullah ve gayruhum mine’l-huzzâr.