Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 361 Hüküm no: 440 Orijinal metin no: [90a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun tarafından Asiye bt. Ahmed’e geçersiz satışla satılan evin iadesi Mahmiye-i İstanbul’da Gül Câmi‘-i şerîfi mahallesi sâkinelerinden bâ‘isetü hâze’l-kitâb Fâtıma Hatun bt. Mahmud meclis-i şer‘-i hatîr-i lâzımü’t-tevkīrde yine mahalle-i mezbûre sâkinelerinden olup zâtı zeyl-i kitâbda mastûrü’l-ism Müslimîn ta‘rîfleriyle mu‘arrefe olan Asiye bt. Ahmed nâm hatun mahzarında üzerine da‘vâ ve takrîr-i kelâm edip mahalle-i mezbûrede vâki‘ iki tarafdan mezbûre Asiye Hatun mülkü menzil ve bir tarafdan mahalle-i mezbûre müezzinine meşrûta vakf menzil ve bir tarafdan tarîk-ı hâs ile mahdûd fevkānî iki bâb oda ve bir mikdâr havlu ve kenîfi müştemil mülk menzilimi bin yüz kırk üç senesi Zilka‘deti’ş-şerîfesi’nin yirmi ikinci günü beni olunca [olunca beni] içinden ihrâc etmemek şartıyla elli üç guruşa mezbûre Asiye Hatun’a bey‘ ve kabz-ı semen edip yedine hüccet vermişidim. Hâlâ şart-ı mezkûr ile bey‘-ı mezbûrun fesâdına binâen semen-i mezbûru kendiye red ve menzil-i mezbûru geri bana teslîme tenbîh olunmak murâdımdır dedikde gıbbe’s-suâl mezbûre Asiye Hatun cevâbında fi’l-hakīka târih-i mezbûrda bey‘-ı mezbûr ber-vech-i meşrûh şartla olduğunu ikrâr ve i‘tirâf etmeğin alâ-mûceb-i i‘tirâfihî bey‘-ı mezbûr şarta mukārin olmağla bey‘-ı mezbûrun fesâdıyla ba‘de’l-hükm semen-i mezbûru kabz ve menzil-i merkūmu müdde‘iye-i mezbûre Fâtıma Hatun’a red ve teslîme mezbûre Asiye Hatun’a tenbîh birle mâ-vaka‘a bi’t-taleb ketb olundu. Fî 13 Muharrem sene [1]144. Şuhûdü’l-hâl: Mehmed Çelebi b. Abdullah, Kādızâde İbrahim b. Mustafa, Ahmed b. el-Hâc Hasan, Salih Çelebi b. Süleyman, Abdullah Çelebi b. Mustafa, diğer Mehmed Çelebi b. Abdullah.