Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 362 Hüküm no: 441 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kigi kasabası maden çalışanlarının Maden Emini İsmail Ağa’da alacaklarının kalmadığı Ahz u kabz. Medîne-i Erzurum Sancağı’nda vâki‘ nefs-i Kigi kasabası ahâlîsinden olup kendi nefslerinden asâleten ve kasaba-i mezbûre re‘âyâsı ma‘lûmü’l-esâmî ve mahsûrü’l-eşhâs taraflarından vekîlleri olan Genco v. Astor ve Artin v. Kazer ve Avanis v. Yagob ve Aslan v. Parsih ve Markar v. Avanis ve Marat v. Artin ve Artin v. Bagdik ve diğer Markar v. Mardik ve Astor v. Ohan ve Bagdik v. Astor ve Minas v. Vartan ve Kirkor v. Emrik nâm zimmîler meclis-i şer‘de kasaba-i mezbûrede vâki‘ sâbıkā Ma‘den emîni bâ‘isü hâze’l-kitâb el-Hâc İsmail Ağa b. Hüseyin mahzarında her biri asâleten ve vekâleten ikrâr ve takrîr-i kelâm edip ma‘den-i mezkûrdan ihrâc ve kârhâne ve fırınlara nakleylediğimiz cevherin hafriye ve nakliye ve rençberân ücretlerimiz için işbu Dîvân tezkiresi nâtık olduğu üzere mûmâ-ileyh İsmail Ağa yedinde bâkī kalan yedi yüz on altı buçuk guruşu mûmâ-ileyh İsmail Ağa bize tamamen edâ ve teslîm biz dahi ber-vech-i muharrer yedinden ahz u kabz edip zikrolunan ücretlerimizden mûmâ-ileyh İsmail Ağa yedinde ve zimmetinde bir akçe ve bir habbe hakkımız bâkī kalmamağın husûs-ı mezkûra vesâire müte‘allika âmme-i da‘vâdan mûmâ-ileyhi ibrâ ve ıskāt eyledi dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 Muharrem sene [1]144. Şuhûdü’l-hâl: Ali Ağa tâbi‘-i kîsedâr efendi, Halil Efendi halîfe-i Başmuhâsebe, el-Hâc İbrahim b. Ömer, Ali Ağa b. Mustafa.