Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 69 Hüküm no: 62 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ligori’nin Seyisoğlu İsrail’e olan borcunun ödendiği Medîne-i Üsküdar’a muzâfe Adalar nâhiyesine tâbi‘ Maldepe karyesinde mütemekkin iken bundan akdem hâlik olan Ligori v. Kaniti zimmînin verâseti zevce-i metrûkesi Margarit bt. İstasi? Nasrâniye ile sulbî sagīr oğulları Tafrani ve Ligoradise ve anası Zahorya bt. Lutran? Nasrâniyeye münhasıra oldukdan sonra zevce-i mesfûre kendü nefsinden asıl ve bâ-hüccet-i şer‘iye ile vasîsi olup sagīrân-ı merkūmânın tarafından vesâyeten ve anası mesfûrenin dahi kezâlik tarafından vekîl-i müseccel-i şer‘îsi olan zevce-i mesfûrenin babası merkūm İstasi v. Yorgi meclis-i şer‘-i hatîrde medîne-i mezbûrede mütemekkin sarrâf tâifesinden işbu râfi‘ü’r-rakīm Seyisoğlu İsrail v. ( ) zimmî muvâcehesinde bi’l-vekâle ikrâr ve takrîr-i kelâm edüp müvekkilûn-ı mesfûrûnun mûrisleri olup hâlik olan merkūm Ligori zimmînin merkūm İsrail zimmîye bâ-temessük cihet-i karz-ı şer‘den iki yüz guruş vâcibü’l-edâ deyni olup deyn-i mezkûru nakden vermeye kudretleri olmamağla beynleri ıslâh olunup nakden elli guruşu merkūm İsrail’e def‘ u teslîm bâkī yüz elli guruş mukābelesinde bi’t-terâzî tereke-i hâlik-i merkūmun ile’l-helâk yedinde mülkü olup ve ba‘de’l-helâk verese-i müvekkilûn-ı mesfûrûna isâbet ve intikāl eden karye-i mezbûr toprağında mezarlık karşısında vâki‘ bir tarafı Koca Süleyman bağı ve bir tarafı Aci İstorinos bağı ve bir tarafı İstoros bağı ve bir tarafı tarîk-i âm ile mahdûd tahmînen dört dönüm bir kıt‘a kürûmî mülk yerli bağın tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz elli guruş kıymet ile merkūm İsrail’e bey‘ u teslîm ve temlîk eylediklerinde ol dahi ber-vech-i muharrer iştirâ ve tesellüm ve temellük ve kabz u kabûl edüp fîmâ-ba‘d bağ-ı mezkûrda müvekkilûn-ı verese-i mesfûrûnun kat‘â ve kātıbeten alâka ve medhalleri kalmayup merkūm İsrail zimmînin deyn-i mezkûr mukābelesinde mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Recebi’l-ferd sene [1]179 Şuhûdü’l-hâl: Berber Abdurrahman, Molla Mehmed, Ahmed Efendi, Ahmed Ağa, Serdâr Mehmed Ağa, Kayseriyeli Mehmed Ağa. Manol, ...? Aci Angeli, Angeli v. Estoban, Perafil v. Kuriş.