Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 305 Hüküm no: 438 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin evini sattığı Mahmiye-i İstanbul’da Timurtaş Mahallesi’nde sâkin Mehmed Çelebi b. Hasan nâm kimesne meclis-i şer‘-i hatîr-i lâzımü’t-tevkīrde işbu sâhibü’l-kitâb Bostancı el-Hâc Mustafa b. İbrahim nâm kimesne mahzarında ikrâr-ı tâm ve takrîr-i kelâm edip mahalle-i merkūmede vâki‘ bir tarafı Mehmed Çelebi mülkü ve bir tarafı Medîne-i münevvere Vakfı’na ve bir tarafı Timurtaş Vakfı’na ve bir tarafı tarîk-i âm ile mahdûd Ayasofya-i kebîr Evkāfı’na senede yirmi akçe mukāta‘âsı olan tûlen on dokuz buçuk zirâ‘ ve arzan iki buçuk zirâ‘ mülk arsa üzerine mebnî olup fevkānî bir beyti ve tahta-pûşu ve üstünde köşkü ve altında bir bâb dükkânı ve muhavvatayı ve kenîfi müştemil olan menzili cemî‘ tevâbi‘ ve levâhıkı ve kâffe-i menâfi‘i ile mezbûr Bostancı el-Hâc Mustafa’ya elli bin akçeye tarafeynden îcâb ve kabûlü hâvî bey‘-i kat‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı merkūmu müşteri-i mezbûr yedinden bi’t-tamam ahz u kabz edip zikrolunan menzil ba‘de’l-yevm müşteri-i mezbûrun mülk-i müşterâsıdır, keyfe mâ yeşâ’ ve yehtâr mutasarrıf olsun dedikde mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Şevvâli’l-mükerrem li-sene erba‘a ve sittin ve elf. Şuhûdü’l-hâl: el-Hâc Osman b. Ahmed, Mehmed Çelebi b. İbrahim, Yahya Beşe b. Mustafa, Ali b. Mehmed, Hasan Dede b. Kurd, İbrahim Çelebi b. Davud, Pîrî Beşe b. Hüseyin ve gayruhum mine’l-huzzâr.