Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 369 Hüküm no: 451 Orijinal metin no: [92a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin Beyceğiz mahallesinde bulunan mülk ev arsasını Minkârîzâde Abdullah vakfı mütevellisine istiğlâl yoluyla sattığı el-Hâc Kâtib Mustafa Efendi’nin istiğlâli. Mahmiye-i İstanbul’da Beyceğiz mahallesinde sâkin el-Hâc Mustafa Efendi b. Mehmed meclis-i şer‘-i hatîr-i lâzımü’t-tevkīrde merhûm Minkārîzâde Abdullah Efendi’nin nukūd-ı mevkūfesine kāimmakām-ı mütevellî olan işbu bâ‘isü’l-kitâb Hüseyin Ağa b. Şa‘ban mahzarında ikrâr-ı tâm ve takrîr-i kelâm edip yedimde mülk ve hakkım olup mahalle-i mezkûrede vâki‘ bir tarafdan Bürüncüklü Mehmed Çelebi tasarrufunda olan vakıf menzil ve bir tarafdan Penbal Mehmed Beşe tasarrufunda olan vakıf menzil ve bir tarafdan âhar vakıfdan tasarrufumda olan vakf menzil ve ba‘zen Fâtıma Hatun tasarrufunda olan vakıf menzil ve ba‘zen tarîk-ı âm ile mahdûd muhterik mülk menzil arsa-i hâliyemi cümle tevâbi‘i ile bi-tarîkı’l-istiğlâl mütevellî-yi mezbûr Hüseyin Ağa’ya yüz yirmi beş guruşa bey‘ ve teslîm ol dahi iştirâ ve tesellüm edip semeni olan meblağ-ı mezbûr yüz yirmi beş guruşu mal-ı vakf-ı mezbûrdan olmak üzere yedinden tamamen ahz u kabz eylediğimden sonra mütevellî-yi mezbûr arsa-i mahdûde-i mezkûreyi ba‘de’t-tahliyeti’ş-şer‘iye ve’t-tekâbuzi’l-mer‘î târih-i kitâbdan iki sene tamamına değin her senesi on sekiz guruş üç rub‘ guruşdan cem‘an otuz yedi buçuk guruşa bana îcâr ve teslîm ben dahi ber-vech-i muharrer istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Muharremi’l-harâm li-sene erba‘a ve erba‘în ve mie ve elf. Şuhûdü’l-hâl: el-Hâc Abdülkadir Ağa b. el-Hâc Abdurrahman, el-Hâc Ali Ağa b. Rüstem, Başkâtib Mustafa Efendi b. Yunus Efendi, Mukayyid el-Hâc Mehmed Efendi b. Hasan, es-Seyyid Abdülaziz Ağa b. Şa‘ban, es-Seyyid Mustafa Ağa b. Şa‘ban, Çuka[dâr] Mehmed Ağa b. ( ).