Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 370 Hüküm no: 452 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan Çarşısı’nda ve Tavukpazarı’nda şirden çorbası pişiren Simo’ya İşkenbeciler Kethudası’nın engel olmaması Şirdencilerin emridir. Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘ü a‘lâmi’ş-şerî‘ati ve’d-dîn vâris-i ulûmü’l-enbiyâ ve’l-mürselîn el-muhtassu bi-mezîd-i inâyeti’l-meliki’l-Mu‘în Mevlânâ İstanbul kādısı zîdet fezailehû tevkî‘-i refî‘-i hümâyûn vâsıl olıcak ma‘lûm ola ki; Simo nâm zimmî Südde-i sa‘âdetime arzuhâl edip mesfûr İstanbul’da kadîmden Mercan çarşısında ve Tavukpazarı’nda mutasarrıf olduğu iki bâb dükkânında şirden şurbası işleyip işkenbe şurbası işlemez iken hâlâ İşkenbeciler Kethudâsı üzerine musallat ve kadîme mugāyir şirden şurbası ve sirke ve sarımsak dükkânlarında bulunmasın deyü mümâna‘at üzere olmağla sâire sirâyet eylememek üzere ancak iki dükkândan kadîmden olıgeldiği üzere işlemelerine mümâna‘at olunmamak için ammim Sultan Ahmed Han zamamında emr-i şerîf verildiğin bildirip mûcebince tecdîdin recâ etmeğin hilâfına emr-i âhar sâdır olmuş değil ise vech-i meşrûh üzere amel olunmak emrim olmuşdur. Buyurdum ki; ( ) vüsûl buldukda bu bâbda sâdır olan emrim üzere amel dahi vech-i meşrûh üzere sâire sirâyet eylememek üzere ancak iki dükkânda kadîmden olıgeldiği üzere işlemelerine mümâna‘at ettirilmeyip mazmûn-ı emr-i şerîfimle âmil olasın. Şöyle bilesin alâmet-i şerîfe i‘timâd kılasın. Tahrîren fî-evâili şehri Rebî‘i’l-âhir li-sene selâse ve erba‘în ve mie ve elf. Be-makām-ı Kostantıniyyeti’l-mahrûse.