Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 371 Hüküm no: 453 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kazasının kürekçi bedeli olan avârız hanelerinden avârız bedellerinin tahsili Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘ü a‘lâmi’ş-şerî‘ati ve’d-dîn vâris-i ulûmü’l-enbiyâ ve’l-mürselîn el-muhtassu bi-mezîd-i inâyeti’l-meliki’l-Mu‘în Mevlânâ İstanbul kādısı zîdet fezailehû tevkî‘-i refî‘-i hümâyûn vâsıl olıcak ma‘lûm ola ki; Hazîne-i âmirem defterleri mûcebince mahrûse-i İstanbul kazâsının iki bin altı yüz doksan dokuz buçuk ve bir sülüs kürekçi bedeli avârız hânesi olup bin yüz kırk dört senesine mahsûb olmak üzere kürekci bedeli avârızları mâlı cem‘ ve tahsîl olunmak lâzım gelmeğin Tersâne-i âmirem emîni ( ) zîde mecduhûya der-uhde olunup mühürlü ve nişânlı Mevkūfât Defteri sûreti verilmekle mûcebince cem‘ ve tahsîl ettirilmek fermânım olmuşdur. Buyurdum ki: hükm-i şerîfimle vardıkda bu bâbda sâdır olan emrim üzere amel edip dahi kazâ-i mezbûrun ol mikdâr kürekci bedeli avârız hânesi olup târih-i mezbûra mahsûb olmak üzere her biri avârız hânelerinden dörder yüz yirmi dokuzar akçe kürekci bedeli avârızları verilen mühürlü nişânlu Mevkūfât defteri sûreti mûcebince cem‘ ve tahsîl ve dahl-i Tersâne-i âmirem ettirdip hilâf-ı emr ve defter kimesneye inâd ve muhâlefet ettirmeyesin ve bundan mâ‘adâ her bir avârız hânelerinden on beşer akçe dahi Tersâne ve onar akçe vech-i [meşrûh üzere] ma‘âş aldırıp ziyâde aldırmayasın ve avârız için alınan akçenin her yüz on akçesinden bir esedî guruş aldırıp ve hîn-i tahsîlde alınan akçeyi Hazîne-i âmirem alındığı vech üzere aldırıp ziyâde ve noksan alınmaya ve aldırmayasın kesr ve defterden ( ) hâneden ve fermânımdan ziyâde talebiyle zulüm ve te‘addîden ihtirâz ve ictinâb eyleyesin. Şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâdis aşer Zilhicce sene selâse ve erba‘în ve mie ve elf. Be-makām-ı Kostantıniyyeti’l-mahrûse.