Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 373 Hüküm no: 455 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah ile Mehmed b. Ahmed’in muhâlaa yoluyla boşandıkları Muhâla‘a. Mahmiye-i İstanbul’da Ayasofya-i kebîr mahallesi sâkinelerinden olup zâtı es-Seyyid Yahya b. Bayram ve eş-Şeyh Ali b. Hasan ta‘rîfleriyle mu‘arrefe olan Âişe bt. Abdullah nâm hatun meclis-i şer‘-i şerîf-i enverde zevc-i dâhili bâ‘isü hâze’l-kitâb el-Hâc Mehmed b. Ahmed nâm kimesne mahzarında ikrâr ve takrîr-i kelâm edip mezbûr el-Hâc Mehmed zevcim olup beynimizde hüsn-i mu‘âşetimiz olmamağla zimmetinde mütekarrir ve ma‘kūdün-aleyh altı yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve kendiye medfû‘um olan beş guruş bedel-i hul‘ olup me’ûnet-i süknâm dahi kendi üzerime olmak üzere zevcim mezbûr el-Hâc Mehmed’i muhâla‘a-i sahîha-i şer‘iye ile muhâla‘a eylediğimde ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 22 Muharrem sene [1]144. Şuhûdü’l-hâl: es-Seyyid Yahya Çelebi b. Bayram, eş-Şeyh Ali b. Hasan, el-Hâc İbrahim b. Abdurrahman, İbrahim Çelebi b. Mustafa du‘âcı.