Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 373 Hüküm no: 456 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâyezidağa mahallesinden Hanım bt. Murad’ın kızı Ayşe ve dâmadı İbrahim’den alacak iddiasının sulhla sonuçlandığı Mahmiye-i İstanbul’da Topkapısı kurbünde Bâyezid Ağa mahallesinde sâkine olup zâtı ta‘rîf-i şer‘î ile mu‘arrefe olan Hanım bt. Murad nâm hatun meclis-i şer‘-i şerîf-i enverde işbu bâ‘isetü’l-vesîka kebîre kızı Âişe bt. el-Hâc Hasan nâm hatun ile dâmadı İbrahim b. el-Hâc Halil nâm kimesneler mahzarlarında ikrâr ve takrîr-i kelâm edip mezbûre Âişe’ye bundan akdem ber-mûceb-i defter mecmû‘u altmış guruş kıymetli eşyâ-i memlûke bi-tarîkı’l-âriye mezbûr Âişe’ye def‘ ve teslîm ol dahi yedimden ahz u kabz etmekle eşyâ-i mezbûre mevcûde ise a‘yânın müstehleke ise ba‘de’s-sübût kıymet-i şer‘iyelerini taleb ve da‘vâ eylediğimde ve dâmadım mezbûr İbrahim dahi benden kızım mezbûreyi tezevvüc murâd eylediğinde mu‘accel olmak üzere bana medfû‘u olan doksan dört guruşu benden da‘vâ sadedinde olmağla beynimizde nizâ‘-ı kesîre vâki‘ olmuşidi. El-hâletü-hâzihi beynimize muslihûn tavassut edip her birimiz da‘vâ-yı mezkûremizden fâriğa olup husûs-ı mezkûre ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan ben mezbûrânın zimmetlerini ibrâ-i âm ile ibrâ ve ıskāt eylediğimde onlar dahi kezâlik meblağ-ı mezbûr doksan dört guruşa müte‘allika âmme-i da‘vâ ve kâffe-i mutâlebât ve eymân ve muhâsamâtdan benim zimmetimi ibrâ-i âmm-ı <> kātı‘u’n-nizâ‘la ibrâ ve ıskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-şehri Muharremi’l-harâm sene [1]144. Şuhûdü’l-hâl: Mehmed Çelebi b. Abdullah, Du‘âcı İbrahim b. Mustafa, es-Seyyid Ali Çelebi b. Ahmed, Solak Mustafa Çelebi b. ( ), Mehmed Çelebi b. Ali.