Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 306 Hüküm no: 439 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ömer Bey’in terekesini elinde bulunduran Şahbaz Paşa’dan vârislerin haklarını aldıkları Husûs-ı âti’r-rakīm mahallinde ketb ü terkīm olunması’çün bi’l-iltimâs bu hakīr zeyl-i kitâbda mastûrü’l-esâmî olan Müslimîn ile mahmiye-i İstanbul’da Demirkapı civârında Dâye Hatun Mahallesi’nde sâkin olup sâbıkā Sivas beylerbeyisi olan emîrü’l-ümerâi’l-kirâm kebîrü’l-küberâi’l-fihâm Şahbaz Paşa hazretlerinin sâkin oldukları saraya varıp akd-i meclis-i şer‘-i şerîf olundukda fi’l-asl vilâyet-i Rumeli’nde Hersek sancağında Prepol kazâsına tâbi‘ Tolca nâm karyeden olup Mısr-ı Kāhire’de zümre-i râcilînden iken bundan akdem vefât eden el-Hâc Ömer Bey b. Seydî’nin verâseti karye-i mezbûrede sâkin li-ebeveyn er karındaşı İshak ile li-ebeveyn kız karındaşı Latife’ye münhasıra olup kable’l-kısmet mezbûr İshak dahi vefât edip verâseti karye-i mezbûrede sâkine zevcesi Sâliha bt. Hasan ile sulbî sagīr oğulları Hüseyin ve Ahmed ve Şa‘ban ve sulbiye sagīre kızları Kamer ve Güle’ye münhasıra olduğu şer‘an mütebeyyen ve mezbûre Sâliha sıgār-ı mezbûrînin tesviye-i umûrlarına kıbel-i şer‘den mansûbe vasîleri olduğu müte‘ayyen olup mezbûretân Latife ve Sâliha taraflarından müteveffâ-i mezbûr el-Hâc Ömer Bey’in muhallefâtına vâzı‘u’l-yed olan paşa-yı müşârun-ileyhden da‘vâ ve talebe ve ahz u kabz ve kendilere îsâle ve lede’l-hükkâmi’l-kirâm kabz ve îsâle mütevakkıf olan umûra vekîl olup vekâleti hasm-ı münkir mahzarında karye-i mezbûre ahâlîsinden el-Hâc Murad b. Musa ve el-Hâc Osman b. Ca‘fer ve Ömer Beşe b. Arslan ve Hasan b. Oruç nâm kimesneler şehâdetleri ile şer‘an sâbite olan Ramazan b. el-Hâc Osman meclis-i mezbûrda işbu râfi‘u’l-vesîkati’ş-şer‘iyye müşârun-ileyh paşa hazretleri mahzarlarında bi’l-vekâle ikrâr u i‘tirâf edip müteveffâ-i mezbûr el-Hâc Ömer Bey’in vasiyy-i muhtârı olmağla fevt olduğu hînde muhallefâtını kabz eden Şa‘ban Bey b. Ferhad ve Mısr-ı Kāhire müteferrikalarından olmağla ol muhallefâtı verese-i mezbûra îsâl etmek için Mısır’dan getirip kassâm defteri mûcebince paşa-yı müşârun-ileyhe teslîm onlar dahi kabz ve tesellüm etmişler idi. Hâlâ ol muhallefâtı vekâletim hasebiyle mûmâ-ileyh hazretlerinden yine kassâm defteri mûcebince bi’t-tamam ve’l-kemâl ahz u kabz eyledim, mûmâ-ileyh hazretleri yedinde müteveffâ-i mezbûrun kalîl ü kesîr ve celîl ü hakīr muhallefâtından ism-i mâl ıtlâk olunur bir şey bâkī kalmadı dedikde gıbbe’t-tasdîk ve’t-taleb mâ-vaka‘a ketb ü sebt olundu. Tahrîren fi’l-yevmi’s-sâbi‘ min-Şevvâli’l-mükerrem li-sene erba‘a ve sittin ve elf. Şuhûdü’l-hâl: el-Hâc Osman b. Ca‘fer, Ahmed Efendi [b.] Dânişmend, Derviş Beşe b. Oruç, Ahmed Bey b. Abdullah, el-Hâc Ahmed b. Hüdaverdi, Halil Beşe b. Lütfullah, es-Seyyid Ali Efendi Vânî, Mahmud b. Ali.