Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 374 Hüküm no: 457 Orijinal metin no: [93b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ahmed ile Mehmed b. Şahin’in muhâlaa yoluyla boşandıkları Mahmiye-i İstanbul’da Acem Ağa mahallesi sâkinelerinden olup zâtı el-Hâc Süleyman b. Mehmed ve Ali b. Mehmed nâm kimesneler ta‘rîfleriyle mu‘arrefe olan Fâtıma bt. el-Hâc Ahmed nâm hatun meclis-i şer‘-i hatîr-i lâzımü’t-tevkīrde zevc-i dâhili işbu râfi‘u’l-kitâb Mehmed b. Şahin nâm kimesne mahzarında ikrâr ve takrîr-i kelâm edip mezbûr Mehmed zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olup ve zevcim mezbûr Mehmed’e medfû‘um olan üç yüz akçe bedel-i hul‘ olmak üzere zevcim mezbûr Mehmed ile muhâla‘a-i sahîha-i şer‘iye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’ş-şer‘î mezbûre Fâtıma’nın babası mezbûr el-Hâc Ahmed meclis-i şer‘de takrîr-i kelâm edip kızım mezbûre Fâtıma fîmâ-ba‘d mehr-i mezkûra müte‘allika zevci mezbûr Mehmed’den nesne taleb ve da‘vâ ve ahz u kabz eder ise me‘hûzuna ben dâmin ve kefîlim dedikde mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-şehri Muharremi’l-harâm sene 1144. Şuhûdü’l-hâl: el-Hâc İbrahim b. Ali, el-Hâc Süleyman b. Mehmed, İbrahim b. Mustafa, el-Hâc Abdurrahman b. Ali, Şamlı İbrahim, el-Hâc Mehmed, el-Hâc Süleyman b. Mehmed, Ali b. Mehmed.