Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 375 Hüküm no: 459 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kendisini dükkândan çıkarıp malına el koyan ortağı Osman’dan Boyacı Panayot’un alacağı olduğu iddiasıyla açtığı davanın sulhla sonuçlandığı Vilâyet-i Anadolu’da Soma kasabası mütemekkinlerinden olup mahmiye-i İstanbul’da Molla Kestel mahallesinde müsâfiren sâkin Boyacı tâifesinden Panayot v. Nikola nâm zimmî meclis-i şer‘-i şerîf-i enverde bâ‘isü hâze’l-kitâb el-Hâc Osman b. Hızır nâm kimesne mahzarında ikrâr ve takrîr-i kelâm edip mezbûr el-Hâc Osman ile bundan akdem kasaba-i mezbûrede boyacılık san‘atında şerîkler olup zikrolunan kasabada vâki‘ dükkânımda mevcûd ber-mûceb-i defter kendi mâlım olan mecmû‘u üç yüz altmış guruş kıymetli boya eczâsı vesâir eşyâmı mezbûr el-Hâc Osman bi-gayr-ı hakkın ahz u kabz ve dükkân-ı mezbûrdan beni ihrâc etmekle zikrolunan eczâ ve eşyânın aynıları mevcûd ise a‘yânın müstehlek ise ba‘de’s-sübût kıymet-i şer‘iyelerini taleb ve da‘vâ eylediğimde ol dahi cevâbında zikrolunan eczâ ve eşyâyı kırk guruş semen-i medfû‘u bâtten bana bey‘ ve teslîm eyledi deyü def‘ eylediğinden beynimizde nizâ‘-ı küllî cereyân etmişidi. El-hâletü-hâzihi beynimize muslihûn tavassut edip da‘vâ-yı mezkûremden beni mezbûr el-Hâc Osman ile on altı guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on altı guruşu mezbûr el-Hâc Osman yedinde tamamen ahz u kabz eyledikden sonra husûs-ı mezkûra ve târih-i kitâba gelince sâir beynimizde cereyân eden ahz u i‘tâya müte‘allika âmme-i da‘vâdan mezbûr el-Hâc Osman’ın zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi kezâlik husûs-ı mezkûra ve târih-i kitâba gelince sâir beynimizde cereyân eden ahz u i‘tâya müte‘allika âmme-i da‘vâdan benim zimmetimi ibrâ ve ıskāt eyledi ba‘de’l-yevm bir birimiz ile vechen mine’l-vücûh ve sebeben mine’l-esbâb kat‘a da‘vâ nizâ‘ımız yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 25 Muharrem sene [1]144. Şuhûdü’l-hâl: Molla İbrahim b. Mehmed, Abdullah Çelebi b. Mustafa, Ahmed Çelebi b. Hasan, İbrahim Çelebi b. Mustafa du‘âcı, Mehmed Çelebi b. Abdullah.