Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 72 Hüküm no: 3 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin evini Hatice Hatun’a sattığı Mübâya‘a-i menzil, 620 guruş Mahmiye-i İstanbul’da Toptaşı mahallesinde sâkin Mehmed Beşe b. Ahmed nâm kimesne meclis-i şer‘-i hatîr-ı lâzımü’t-tevkīrde bâ‘isetü’l-kitâb Hadîce bt. Ali b. Abdullah nâm hatun tarafından husûs-ı âti’z-zikri tasdîka vekîl olduğu zâtını ârifân es-Seyyid el-Hâc Abdulkadir b. es-Seyyid Ahmed ve Halil Beşe b. Ahmed nâm kimesneler şehâdetleriyle sâbit olan vâlidesi Âişe bt. Salih nâm hatun muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Mustafa Çavuş kerîmesi menzili ve bir tarafdan el-Hâc Ali menzili ve bir tarafdan Medîne-i münevvere Vakfı’ndan olan odalar ve bir tarafdan tarîk-i hâs ile mahdûd dâhiliyede fevkānî üç bâb oda ve bir sofa ve dehliz ve tahtânî iki sofa ve bir matbah ve bi’r-i mâ ve kenîf ve eşcâr-ı müsmireli bahçe ve hâriciyede tahtânî bir bâb oda ve bir ahur ve kenîf ve bir mikdâr havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkile-i mezbûre Hadîce Hatun’a altı yüz yirmi guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr altı yüz yirmi guruşu müvekkile-i mezbûre Hadîce Hatun yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda kat‘an benim alâka ve medhalim kalmayıp müvekkile-i mezbûre Hadîce Hatun’un mülk-i müşterâsı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe sene 1152. Şuhûdü’l-hâl: el-Hâc Salih b. Hacı Abdullah, Mehmed Odabaşı K 26, Hacı Yusuf b. Musli, Halil Beşe b. İbrahim vekîlharç, Mustafa Ağa b. Osman, Halil b. Ahmed