Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 307 Hüküm no: 440 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mesud b. Süleyman’ın ev, bağ ve bahçedeki hissesini kardeşi Merzuk’a sattığı Fi’l-asl cezîre-i Cerbe ahâlîsinden olup hâlâ mahmiye-i İstanbul’da tüccâr tâifesinden olan Mesud b. Süleyman nâm kimesne mahfil-i şer‘-i şerîfde li-ebeveyn karındaşı olan işbu sâhibü’l-kitâb Merzuk b. Süleyman nâm kimesne muvâcehesinde ikrâr-ı tâm ve takrîr-i kelâm edip cezîre-i mezbûrede vâki‘ beyne’l-ahâlî ve’l-cîrân ma‘lûmü’l-hudûd olan menzil ve bağ ve bağçede mülk-i mevrûsum olan nısf hisse-i şâyi‘amı karındaşım mezbûr Merzuk’a bi-safkatin vâhidetin yirmi altı bin altı yüz akçeye bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semen-i mezbûr yirmi altı bin altı yüz akçeyi ahz [ve] istîfâ eyleyip hisse-i mezbûreyi mahallinde kabz ve tesellüme mezbûru taslît eyledim ba‘de’l-yevm hisse-i mezbûre mülk-i müşterâsı olup kat‘an benim alâka ve medhalim kalmamışdır, hasbe-mâ yürîd mutasarrıf olsun dedikde gıbbe’t-tasdîk mâ-vaka‘a bi’t-taleb sebt ü ketb olundu. Fî-evâili Şevvâli’l-mükerrem min-şühûr sene erba‘a ve sittin ve elf. Şuhûdü’l-hâl: el-Hâc Salim b. Cum‘a, el-Hâc Ali b. İbrahim, Ebûbekir b. Ali, Ramazan b. Salim, İbrahim b. Davud ve gayruhum mine’l-huzzâr.