Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 76 Hüküm no: 6 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un evdeki hissesini kocası Kasım Ağa’ya sattığı Mübâya‘a-i hisse 3.000 guruş, bi-imzâ-i efendi Mahmiye-i İstanbul’da Ali Paşa-i atîk mahallesinde sâkine olup zâtı mahalle-i mezbûre imâmı el-Hâc İsmail Efendi b. Derviş ve el-Hâc Ahmed b. Mehmed ta‘rîfleriyle mu‘arrefe olan Hadîce bt. Abdülvahab Ağa nâm hatun meclis-i şer‘-i hatîr-ı lâzımü’t-tevkīrde işbu bâ‘isü’l-vesîka zevci Kasım Ağa b. Ramazan mahzarında ikrâr ve takrîr-i kelâm edip mahmiye-i mezbûrede Gül Câmi‘i mahallesinde vâki‘ Ayakapısı hâricinde vâki‘ bir tarafdan Bostancıbaşı odaları ve bir tarafdan Kürkçübaşı odaları bir tarafdan tarîk-i âm ve taraf-ı râbi‘i sâhil-i bahr ile mahdûd büyût-ı adîde ve altı bâb dükkân ve kayıkhâneyi müştemil Rum hânenin rub‘-ı şâyi‘i benim ve rub‘-ı âharı kız karındaşım Emine Hatun’un babamız Abdülvahab Ağa’dan mevrûs mülkümüz olup ve iki rub‘u dahi Mahmud Ağa veresesinin olmağla benim mülküm olan rub‘-ı şâyi‘imi tarafeynden îcâb ve kabûlü hâvî bey‘-i kat‘î ile zevcim mezbûr Kasım Ağa’ya üç bin guruşa bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr üç bin guruşu yedinden tamâmen ahz u kabz eyledim ba‘de’l-yevm mârrü’z-zikr Rum hânede olan rub‘-ı şâyi‘am zevcim mezbûr Kasım Ağa’nın mülk-i müşterâsı olup benim kat‘an alâka ve medhalim kalmadı, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 Zilhicce sene 1152. Şuhûdü’l-hâl: el-Hâc İsmail Efendi b. Derviş imâm, Hüseyin Çelebi b. Ali müezzin, el-Hâc Ahmed Ağa b. Mehmed, İbrahim b. Abdullah el-müezzin, Hüseyin Beşe b. Hasan, Salih Çelebi b. Süleyman, el-Hâc Mustafa b. Mehmed