Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 77 Hüküm no: 7 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un eşi Halil ile muhâlaa yoluyla boşandığı Muhâla‘a Mahmiye-i İstanbul’da Sofular mahallesinde sâkine ve zâtı İbrahim Ağa b. Ömer ve Mustafa Beşe b. Abdullah ta‘rîfleriyle mu‘arrefe olan Hanife bt. İbrahim nâm hatun meclis-i şer‘-i şerîf-i enverde zevc-i dâhili bâ‘isü’l-vesîka Halil b. Ali nâm kimesne mahzarında ikrâr ve takrîr-i kelâm edip mezbûr Halil zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan üç bin akçe mehr-i müeccelim ile nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Halil ile muhâla‘a-i sahîha-i şer‘iyye ile hul‘ olduğumda ol dahi ber-vech-i meşrûh hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ-i âmm-ı râfi‘ü’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Zilhicceti’ş-şerîfe sene 1152. Şuhûdü’l-hâl: İbrahim Ağa b. Ömer, Mustafa Beşe b. Abdullah, Mustafa Çelebi b. Ali, Ali Çelebi b. Abdullah