Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 77 Hüküm no: 8 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb b. Hüseyin’in oğlu Mehmed Emin’e nafaka takdiri Nafaka Mahmiye-i İstanbul’da Balaban Ağa mahallesinde sâkin olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan bâ‘isetü’l-vesîka Zeyneb bt. Hüseyin nâm hatun meclis-i şer‘-i hatîr-ı lâzımü’t-tevkīrde zevc-i sâbıkı İbrahim Çelebi b. Hüseyin mahzarında takrîr-i kelâm ve bast-ı merâm edip mezbûr İbrahim Çelebi’nin firâşından hâsıla ve benden mütevellid bi-hakkı’l-hıdâne hacr ve terbiyemde olan işbu Mehmed Emin nâm sagīrin mâlı olmamağla sagīr-i mezbûr Mehmed Emin nafaka ve kisveye ihtiyâcı olmağla babası mezbûr İbrahim Çelebi üzerine kıbel-i şer‘den kadr-ı ma‘rûf meblağ farz ve takdîr olunmak murâdımdır dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīr-i mezbûr Mehmed Emin’in nafaka ve kisve vesâir levâzım-ı zarûriyesi’çün babası mezbûr Mehmed Çelebi üzerine bi’t-terâzi târîh-i kitâbdan yevmî ikişer para farz ve takdîr buyurup meblağ-ı mefrûz-ı mezbûru sagīr-i mezbûr Mehmed Emin’in nafaka ve kisve vesâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr İbrahim Çelebi üzerine rücû‘a mezbûre Zeyneb Hatun’a izin birle mâ-vaka‘a bi’t-taleb ketb olundu. Fi’l-yevmi’s-sâmin min-Zilhicceti’ş-şerîfe sene 1152. Şuhûdü’l-hâl: Hasan Çelebi b. Hüseyin, Abdülbaki b. Ramazan, Ali Çelebi b. Abdullah, Hasan b. Mehmed, Mustafa b. Mehmed