Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 78 Hüküm no: 9 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa reşid olduğundan vasisi elinde bulunan hakkını aldığı Ahz u kabz Mahmiye-i İstanbul’da Şeyh Ferhad mahallesinde sâkine iken bundan akdem vefât eden Saliha Hatun bt. Abdullah b. Abdurrahman’ın sadrî oğlu Mehmed b. Mustafa nâm kimesne meclis-i şer‘-i hatîr-ı lâzımü’t-tevkīrde sâhibü’l-vesîka Hüseyin Çelebi b. Mustafa muvâcehesinde ikrâr ve takrîr-i kelâm edip mezbûr Hüseyin Çelebi vâlidem mezbûre Saliha’nın hîn-i vefâtında ben sagīr olduğuma binâen kıbel-i şer‘den tesviye-i emrime ve mâl-ı mevrûsumu hıfz u hırâsete vasî nasb u ta‘yîn olunmağla vâlidem müteveffiye-i mezbûreden bi’l-ırsi’ş-şer‘î isâbet ve intikāl eden yüz guruş hakkımı bi’l-vesâye ahz u kabz etmiş idi, el-hâletü hâzihi akl-ı rüşd-i sedâdım lede’ş-şer‘i’l-mutahhar zâhir ve müte‘ayyen olmağla vasiyy-i mezbûr Mehmed Çelebi bi’l-vesâye makbûz olan meblağ-ı mersûm yüz guruş hakkımı bana def‘ ü teslîm ettikde ben dahi yedinden tamâmen ahz u kabz ve tesellüm eyleyip meblağ-ı mersûmdan vasiyy-i mezbûrun yedinde ve zimmetinde bir akçe ve bir habbe alacak hakkım kalmamağın târîh-i vesîkaya gelinceye değin âmme-i da‘vâdan vasiyy-i mezbûr Hasan Çelebi’nin zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Zilhicceti’ş-şerîfe sene 1152. Şuhûdü’l-hâl: Süleyman b. Mustafa, Abdurrahman b. Ahmed, Mustafa b. Osman, Osman b. Mustafa, Ömer b. Mustafa, Mehmed b. Abdullah, İvaz b. Abdullah, Molla Hüseyin du‘âcı, es-Seyyid Mustafa Ruhalı, Ali b. Ahmed