Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 79 Hüküm no: 11 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülgeroğlu Camii nukud vakfına ait para ile vakıf için ev satın alındığı Mübâya‘a-i menzil Mahmiye-i İstanbul’da Hoca Kasım Gönânî mahallesi sâkinelerinden Âişe bt. Abdullah nâm hatun ve zevci Mustafa Çelebi b. Şa‘bân b. Abdullah taraflarından husûs-ı âti’z-zikre vekîl olduğu el-Hâc Ahmed b. Ali ve es-Seyyid Mehmed b. es-Seyyid Hasan şehâdetleriyle şer‘an sâbit olan Mehmed Çelebi b. Hacı Süleyman nâm kimesne meclis-i şer‘-i şerîf-i enverde mahmiye-i mezbûrede Dülgeroğlu Câmi‘-i şerîfinde vaz‘ eylediği kürsüsünün nukūd-ı mevkūfesine bi’l-fi‘il mütevellî olup nukūd-ı mezkûru akāra tebdîlini şart eden işbu bâ‘isü’l-kitâb es-Seyyid el-Hâc Ömer b. Osman mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilân-ı mezbûrânın ale’l-iştirâk yedimizde mülk ve haklarımız olup mahalle-i mezbûrede vâki‘ bir tarafdan Berber Hasan Çelebi ve Abdi Çelebi mülkleri ve bir tarafdan Molla İsmail’in tahta perdesine varınca odunluk arsası ve bir tarafdan Kazzâz Şahin nâm Yahûdi menzili ve bir tarafdan tarîk-i âm ile mahdûd tahtânî iki bâb oda ve kenîf ve bi’r-i mâ ve bahçeyi müştemil mülk menzilimizi vakf-ı mezbûra akār olmak için cemî‘ tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr es-Seyyid el-Hâc Ömer’e yüz seksen guruşa bey‘ ve teslîm eylediğimde ol dahi bi’t-tevliye vech-i muharrer üzere iştirâ ve tesellüm ve kabûl edip semeni olan meblağ-ı mezbûr doksan beş guruşunu mütevellî-yi mezbûr es-Seyyid el-Hâc Ömer yedinden mâl-ı vakf-ı mezbûrdan olmak üzere her birimiz bi-kadri’l-hısâs ahz u kabz eyledik menzil-i mahdûd-ı mezkûrda alâka ve medhalimiz kalmayıp vakf-ı mezbûr müstagallâtından oldukdan sonra yine mütevellî-yi mezbûr es-Seyyid el-Hâc Ömer menzil-i mahdûd-ı mezkûru seksen beş guruş icâre-i mu‘accele-i misli ve yevmî bir akçe icâre-i müeccele-i mümâsili ile bi’t-tevliye îcâr ve teslîm eylediğinde biz dahi ber-minvâl-i muharrer ba‘de’l-istîcâr ve’l-kabûl mu‘accele-i merkūme seksen beş guruşunu menzil-i mezbûrun semeninden mütevellî-yi mezbûr zimmetinde bâkī kalan seksen beş guruşa takas ve mahsûb eylediğimizde ol dahi mukāssa ve kabûl eyledi dediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe sene 1152. Şuhûdü’l-hâl: Hacı Mehmed b. İbrahim, Haffâf Ali b. (°), Kethüdâ Hacı Hüseyin, Haffâf es-Seyyid Mustafa, Hasan b. Mehmed, Mehmed b. Süleyman, Hasan b. İbrahim, Hacı Ahmed b. Ali, es-Seyyid Mehmed b. es-Seyyid Hasan