Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 81 Hüküm no: 13 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardıros v. Aleksan’ın bazı eşyalarını sattığı Mübâya‘a-i eşyâ Habbâz tâifesinden olup mahmiye-i İstanbul’da Vâlide Sultan -tâbet serâhâ- Câmi‘-i şerîfi kurbünde mütemekkin Mardıros v. Aleksan nâm Ermeni meclis-i şer‘-i şerîf-i enverde hâmilü’r-rakīm diğer Mardıros v. Serkiz nâm Ermeni muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olan on beledî yasdık ve dört mak‘ad ve sekiz minder ve beş kilim ve sekiz yemenî yorgan ve dört beledî döşek ve yüz on vakıyye evân-ı nühâsiyemi tarafeynden îcâb ve kabûlü hâvî şurût-ı müfsideden ârî bey‘-i kat‘î ve safka-i vâhide ile merkūm diğer Mardıros’a yüz yetmiş guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve kabz ve tesellüm ve kabûl eylediğinden sonra semeni olan meblağ-ı mezbûr yüz yetmiş guruş mutâlebesine müte‘allıka âmme-i da‘vâdan merkūm diğer Mardıros’un zimmetini ibrâ ve ıskāt eyledim ba‘de’l-yevm eşyâ-i muharrere-i mezkûre ve evân-ı nühâsiyede kat‘an benim alâka ve medhalim kalmayıp merkūm Mardıros’un mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe sene 1152. Şuhûdü’l-hâl: İbrahim Beşe b. Mustafa, Mustafa Çelebi b. Süleyman, Ebubekir b. Ömer, Ali Çelebi b. Hasan, Mehmed Çelebi b. Abdullah, Molla Hüseyin du‘âcı, es-Seyyid Mustafa Ruhalı, Mehmed b. İbrahim