Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 81 Hüküm no: 14 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardıros v. Aleksan’ın ev bağını sattığı Mübâya‘a-i bağ Habbâz tâifesinden vilâyet-i Anadolu’da Eğin kazâsına tâbi‘ Kemergüb nâm karye ahâlîsinden olup mahmiye-i İstanbul’da Vâlide Sultan -tâbet serâhâ- Câmi‘-i şerîfi kurbünde ekmekçi fırını ustası Mardıros v. Aleksan nâm Ermeni meclis-i şer‘-i hatîr-ı lâzımü’t-tevkīrde işbu hâmilü’r-rakīm diğer Mardıros v. Serkiz nâm Ermeni muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olan emlâkimden karye-i merkūmede vâki‘ bir tarafdan karındaşım Kirkor menzili ve bir [tara]fdan Şahin menzili ve iki tarafdan tarîk-i âm ile mahdûd fevkānî ve tahtânî iki bâb oda ve önünde bir bâb berber dükkânını müştemil mülk menzilimi ve yine karye-i mezbûre bağları hilâlinde vâki‘ Hararhol bağı demekle ma‘rûf bir tarafı Hacikoğlu zimmî bağı ve bir tarafı Marta zimmî bağı ve bir tarafı Tevekkül meşesi ve bir tarafı tarîk-i âm ile mahdûd kürûmî mülk bağımı ve yine karye-i mezbûre bağları hilâlinde vâki‘ bir tarafdan Harpuh bağı ve bir tarafdan Aknados bağı ve bir tarafdan Şuşek bağı ve bir tarafdan tarîk-i âm ile mahdûd kürûmî mülk bağımın hâfilin? tarafından nısf-ı şâyi‘ini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm diğer Mardıros’a beş yüz elli guruşa bey‘ ve temlîk ve mahallinde her birini kabzına tarafımdan taslît eylediğimde ol dahi ber-vech-i mübeyyin iştirâ ve temellük ve kabûl eylediğinden sonra semen-i mebî‘ beş yüz elli guruş mutâlebesine müte‘allıka âmme-i da‘vâdan merkūm Mardıros’un zimmetini ibrâ-i âm ile ibrâ ve ıskāt eyledim ba‘de’l-yevm hudûd-ı mezkûr ile mahdûd menzil ve bağ ve nısf bağ merkūm Mardıros’un mülk-i müşterâsı olup benim kat‘an alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe sene 1152. Eş-şâhidûnü’s-sâbikūnü’l-Müslimûn Aleksan v. Artin, Avanes v. Arakil, Kirkor v. Markar, Begos v. Aleksan, Matarfan v. Hazer