Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 307 Hüküm no: 441 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin bağını Mustafa Çelebi b. Yahya’ya sattığı Üsküdar kazâsına tâbi‘ İstavroz nâm karye sükkânından Ali Beşe b. Abdullah nâm kimesne meclis-i şer‘-i şerîfde işbu bâ‘isü’l-kitâb Mustafa Çelebi b. Yahya nâm kimesne mahzarında ikrâr ve takrîr-i kelâm edip yine kazâ-i mezbûra tâbi‘ Çengel nâm karyede vâki‘ bir tarafı merhûm Yusuf Efendizâde bağı ve bir tarafı Rum Hasan Beşe nâm kimesne bağı ve iki tarafı Aleksandara nâm zimmî bağları ile mahdûd ve mümtâz olan bir kıt‘a mülk bağımı mezbûr Mustafa Çelebi’ye seksen sekiz kıt‘a riyâlî guruşa bey‘-i kat‘î ile bey‘ edip ol dahi vech-i muharrer üzere iştirâ ve kabûl eyleyip semeni olan meblağ-ı mezbûr seksen sekiz kıt‘a riyâlî guruşu merkūm Mustafa Çelebi yedinden bi’t-tamam ahz u kabz eyledikden sonra zikrolunan bağı <> mahallinde kabz ve tesellüme mezbûr Mustafa Çelebi’yi taslît eyledim ba‘de’l-yevm zikrolunan bağ mezbûr Mustafa Çelebi’nin mülk-i müşterâsı olup kat‘an benim medhalim ve alâkam kalmamışdır, fîmâ ba‘d mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min-Şevvâli’l-mükerrem li-sene erba‘a ve sittin ve elf. Şuhûdü’l-hâl: Mehmed Beşe b. Abdüllatif, Arabzâde Ebûbekir b. Mustafa, Hasan Çelebi b. Hüseyin, el-Hâc Kenan b. Abdullah, Hüseyin Beşe b. Hızır, İbrahim b. Mehmed, Mahmud b. Mehmed, Yusuf b. Abdullah ve gayruhum mine’l-huzzâr.