Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 82 Hüküm no: 15 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un istiğlâl yoluyla yeniçeri on ikinci bölük oda neferatı mühimmatı vakfından borç aldığı İstiğlâl Mahmiye-i İstanbul’da Molla Şerefüddin mahallesinde sâkine ve zâtı ta‘rîf-i şer‘î ile mu‘arrefe olan umdetü’l-muhadderât Fâtıma Hatun bt. Mustafa meclis-i şer‘-i hatîr-ı lâzımü’t-tevkīrde Dergâh-ı âlî yeniçerilerinin on ikinci bölüğün oda neferâtının mühimmâtına mevkūfe nukūdun hâlen mütevellîsi olan hâfızü’l-vesîka Mehmed Ağa b. Mustafa muvâcehesinde ikrâr ve takrîr-i kelâm edip istiğlâl-i âti’z-zikrin sudûruna dek yedimde mülk ve hakkım olup mahmiye-i merkūmede Kirmasti mahallesinde vâki‘ bir tarafdan Ali Efendi ve bir tarafdan merhûm Mansurîzâde Efendi ve bir tarafdan Solakbaşı el-Hâc Ali menzilleri ve taraf-ı râbi‘i tarîk-i âm ile mahdûd hâriciye ve dâhiliyede büyût-ı adîde ve matbah ve kilâr ve bi’r-i mâ ve kenîf ve bir mikdâr bahçe ve havluyu müştemil mülk menzilimi cemî‘ tevâbi‘ ve levâhıkıyla tarafeynden îcâb ve kabûlü hâvî bi-tarîkı’l-istiğlâl mütevellî-yi merkūm Mehmed Ağa’ya beş yüz guruşa bey‘ ve teslîm ol dahi nukūd-ı mevkūfe ile bi’t-tevliye iştirâ ve tesellüm ve kabûl edip semen-i merkūm beş yüz guruşu nukūd-ı mevkūfeden olmak üzere mütevellî-yi merkūm yedinden ahz u kabz eylediğimden sonra mütevellî-yi merkūm Mehmed Ağa menzil-i mahdûd-ı mezkûru gıbbe’t-tahliyeti’ş-şer‘iyye ve’t-tekābuzü’l-mer‘î târîh-i vesîkadan bir sene tamâmına değin yetmiş beş guruşa bi’t-tevliye bana îcâr ve teslîm ben dahi ber-vech-i muharrer iştirâ ve tesellüm ve kabûl eyledim dedikde gıbbe’t-tasdîkı’ş-şer‘î mûmâ-ileyhâ Fâtıma Hatun meclis-i şer‘de Mehmed Çelebi b. Süleyman mahzarında ikrâr ve takrîr-i kelâm edip bey‘-i mezbûr hakīkatde rehin ve meblağ-ı mezbûr taraf-ı vakf-ı mezbûra zimmetimde edâsı lâzım deyn olmağla sene-i mezbûre tamâmında meblağ-ı mezbûr ile icâre-i merkūmeyi edâ eylemezsem menzil-i mahdûd-ı mezkûru semen-i misliyle âhara bey‘e ve kabz-ı semene ve semeninden meblağ-ı mezbûr ile icâre-i merkūmeyi taraf-ı vakf-ı mezbûra edâya ve fazla kalır ise bana teslîme ve bunlar tevakkuf eylediği umûrun küllîsine akd-i rehinde meşrûta azl ü in‘izâlden masûne vekâlet-i devriye ile tarafımdan mezbûr Mehmed Çelebi’yi vekîl ve nâib-i menâb nasb u ta‘yîn eyledim dedikde mezbûr Mehmed Çelebi vekâlet-i mezbûreyi kabûl ve hizmet-i lâzımesini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-Zilhicceti’ş-şerîfe sene 1152. Şuhûdü’l-hâl: Fahrü’l-eimmeti’l-kirâm Süleyman Efendi, Molla Mehmed b. Hüseyin, Mustafa Usta b. Yusuf, es-Seyyid Ahmed b. Süleyman, Numan b. Abdurrahman