Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 83 Hüküm no: 16 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed, Havva ve Afife’nin evlerini Mustafa Ağa’ya satması Mübâya‘a-i menzil Mahmiye-i İstanbul’da Âşık Paşa Câmi‘-i şerîfi kurbünde el-Hâc Ferhad mahallesi sükkânından Mehmed Çelebi b. el-Hâc Abdurrahim nâm kimesne ile zâtları Said Efendi b. İbrahim ve Mustafa Ağa b. İsmail nâm kimesneler ta‘rîfleriyle mu‘arrifân olan vâlidesi Havva bt. Süleyman ve li-ebeveyn kız karındaşı Afife nâm hatunlar meclis-i şer‘-i hatîr-ı lâzımü’t-tevkīrde sâhib-i hâze’l-kitâb Mustafa Ağa b. İsmail nâm kimesne tarafından zikri âtî husûs-ı tasdîka vekîl olduğu mu‘arrifân-ı mezbûrân şehâdetleriyle sâbit olan Ali Efendi b. Mehmed mahzarında her biri ikrâr ve takrîr-i kelâm edip akd-i âti’z-zikrin sudûruna değin ber-vech-i iştirâk irsen ve şirâen yedimizde mülk ve hakkımız olup mahalle-i mezbûrede vâki‘ bir tarafdan ba‘zan Duhânî Osman Çelebi ve ba‘zan müşteri-yi merkūm Mustafa Ağa ve ba‘zan Müezzin el-Hâc Mehmed mülkleri ve bir tarafdan Asiye Hatun menzili ve iki tarafdan tarîk-i âm ile mahdûd sagīr ve kebîr dört bâb oda [4a] ve bir sofa ve dehliz ve hamam ve bahçe ve birbiri üzerinde iki cihânnümâ ve tahta-pûş ve altında bir selâmlık odası ve dehliz ve bir müstakil bi’r-i mâ ve Duhânî Osman Çelebi ile müşterek bir bi’r-i mâ ve kenîfi müştemil mülk menzilimizi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkil-i mezbûr Mustafa Ağa’ya bin sekiz yüz elli guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr bin sekiz yüz elli guruşu müvekkil-i mezbûr Mustafa Ağa yedinden bi-kadri’l-hısâs tamâmen ahz u kabz eyledik ba‘de’l-yevm menzil-i mahdûd-ı mezkûrda kat‘an bizim alâka ve medhalimiz kalmayıp müvekkil-i merkūm Mustafa Ağa’nın mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilhicceti’ş-şerîfe sene 1152. Şuhûdü’l-hâl: Halil Efendi el-imâm, el-Hâc Mehmed b. Ali el-müezzin, Süleyman Usta b. Abdullah, el-Hâc Mustafa b. Abdullah, Attâr Ömer Çelebi b. (°), Mehmed b. Abdullah, Hasan Çelebi b. Abdullah