Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 84 Hüküm no: 17 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vahidizade Mehmed Emin Efendi’nin evini Sadıka Hatun’a satması Mübâya‘a Husûs-ı âti’l-beyânın mahallinde ketb ü tahrîri için cânib-i şer‘-i hatîrden Mevlânâ Feyzullah Efendi b. eş-Şeyh Mehmed Efendi irsâl olunup ol dahi mahmiye-i İstanbul hısnı ebvâbından Cibali Yenikapısı dâhilinde Çukur mahallede sâkin umdetü’l-müderrisîni’l-kirâm Vahidîzâde Mehmed Emin Efendi’nin menziline varıp zeyl-i vesîkada mektûbü’l-esâmî Müslimîn huzûrlarında akd-i meclis-i şer‘-i hatîr ettikde mahmiye-i merkūmede Haraccı Muhyiddin mahallesinde sâkine olup zâtı Mehmed Emin Efendi b. Ali ve Mustafa Çelebi b. Hasan nâm kimesneler ta‘rîfleriyle mu‘arrefe olan Afife bt. İbrahim nâm hatun meclis-i ma‘kūd-ı mezkûrda mûmâ-ileyh Vahidîzâde Mehmed Emin Efendi’nin halîle-i mükerremeleri ve zâtı ta‘rîf-i şer‘î ile mu‘arrefe olan sâhibetü’l-kitâb Sadıka bt. Abdülmennan nâm hatun mahzarında ikrâr-ı tâm ve takrîr-i kelâm edip arsası merhûm Hâcegîzâde Mustafa Efendi Vakfı’na senede yüz seksen akçe mukāta‘alı ve üzerinde olan ebniyesi akd-i âti’z-zikrin sudûruna değin yedimde mülk ve hakkım olup sâlifü’z-zikr Haraccı Muhyiddin mahallesinde vâki‘ bir tarafdan benim sâkine olduğum âhar menzilim ve bir tarafdan Hadîce Hatun menzili ve bir tarafdan tarîk-i hâs ve bir tarafdan tarîk-i âm ile mahdûd fevkānî iki bâb oda ve bir sofa ve bir mağsel ve bir kenîf ve tahtânî bir bâb oda ve bir kenîf ve bir mahtab ve bir bi’r-i mâ ve bahçe ve havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūme Sadıka Hatun’a yedi yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezbûr yedi yüz elli guruşu müşteriye-i merkūme Sadıka Hatun yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûrda benim kat‘an alâka ve medhalim kalmayıp merkūme Sadıka Hatun’un mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan ümenâ-i şer‘le meclis-i şer‘a gelip alâ-vukū‘ihi inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Zilhicce sene 1152. Şuhûdü’l-hâl: Mehmed Ağa b. Şehîd Mehmed, el-Hâc Mehmed Efendi b. İbrahim el-imâm, Kilâr Kâtibi Ahmed Efendi, umdetü’l-müderrisîni’l-kirâm Parsazâde el-Hâc Abdullah Efendi, umdetü’l-mevâli’l-fihâm zübdetü’l-mehâdimü’l-kirâm sâbıkā Selanik Kadısı Mustafa Efendi, Mehmed Çelebi b. Abdullah, Salih Çelebi b. Süleyman, Mustafa Çelebi b. Hasan