Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 85 Hüküm no: 19 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem asıllı Fatıma’nın azat edilmiş olduğundan serbest bırakılması İkrâr-ı Acem Rıkka inkıyâdı sebk etmekle kıbel-i şer‘den ber-vech-i âtî da‘vâya me’zûne olan açık kaşlı, kara gözlü, orta boylu, Acemiyyetü’l-asl, Müslimetü’n-neseb, bâ‘isetü’l-vesîka Fâtıma bt. Mehmed meclis-i şer‘-i hatîr-ı lâzımü’t-tevkīrde kendüye rakīka olmak üzere vaz‘-ı yed eden Mehmed b. Receb nâm kimesne mahzarında üzerine da‘vâ ve takrîr-i kelâm edip ben vilâyet-i İran’da Karadağ kazâsına tâbi‘ Külnadis nâm karye ahâlîsinden Acemiyyü’l-asl, Müslimü’n-neseb Mehmed b. Abdullah’ın firâşından hâsıla ve zevce-i menkûhası Zühre bt. Abdullah nâm Acemiyyetü’l-asldan mütevellid olup bâ-fermân-ı âlî sebîlleri tahliye olunan Müslimetü’n-neseb Acem cinsinden iken mezbûr Mehmed bana rakīkası olmak üzere vaz‘-ı yed eder suâl olunup sebîlim tahliye ve mezbûrun kasr-ı yedine tenbîh olunmak matlûbumdur dedikde gıbbe’s-suâl mezbûr Mehmed cevâbında fi’l-hakīka mevsûf-ı mezbûre bâ-fermân-ı âlî sebîlleri tahliye olunan Müslimetü’n-neseb Acem olduğunu ikrâr ve i‘tirâf etmeğin alâ-mûceb-i ikrârihî mevsûfe-i mezbûrenin bâ-fermân-ı âlî sebîli tahliye ve mezbûrun kasr-ı yedine tenbîh birle mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe sene isneteyn ve hamsîn ve mi’e ve elf. Şuhûdü’l-hâl: es-Seyyid Ali Çelebi b. Mustafa, Hasan Çelebi b. Mehmed, Mehmed Çelebi b. İbrahim, Molla Hüseyin b. el-Hâc Mehmed du‘âcı