Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 86 Hüküm no: 20 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüllatif Efendi’nin Molla İsmail’den istiğlâl yoluyla borç aldığı İstiğlâl Vilâyet-i Rumeli’de Manastır kazâsı ahâlîsinden ve Rumeli kazâsından olup Dârü’l-hilâfeti’l-aliyye Kostantıniyyetü’l-mahmiyede müsâfiren sâkin fahrü’l-kuzât Abdüllatif Efendi b. Ali Efendi meclis-i şer‘-i hatîr-ı lâzımü’t-tevkīrde sâbıkā Diyarbekir kādısı olan a‘lemü’l-ulemâi’l-izâm efdalü’l-fudalâi’l-fihâm sa‘âdetli semâhetli Tezkireci Abdullah Efendi hazretlerinin etbâ‘ından bâ‘isü’l-kitâb Molla İsmail b. Abdurrahman muvâcehesinde ikrâr ve takrîr-i kelâm edip istiğlâl-i âti’z-zikrin sudûruna değin yedimde mülk ve hakkım olup kazâ-i merkūma tâbi‘ Harasca karyesinde vâki‘ bir tarafdan İbrahim Ağa çiftliği ve bir tarafdan Hüseyin menzili ve bir tarafdan taht-ı tasarrufumdaki tarlalar ve bir tarafdan tarîk-i âm ile mahdûd bir oda ve bir ahur ve iki anbâr ve mülk harman mahallini müştemil çiftlik ta‘bîr olunur mülk menzilimi ve yine karye-i merkūmede vâki‘ iki tarafı taht-ı tasarrufumda olan tarlalar ve tarafeyni tarîk-i âm ile mahdûd kebîr iki ahur ve mülk harman mahallini müştemil çiftlik ta‘bîr olunur mülk menzilimi ve kazâ-i merkūma tâbi‘ Gradganiçe karyesinde vâki‘ lede’l-ahâlî ma‘lûmü’l-hudûd iki göz âsiyâb-ı dakīkımı ve yine karye-i mezbûre bağlarında vâki‘ lede’l-ahâlî ma‘lûmü’l-hudûd kürûmî mülk beş kıt‘a bağlarımı târîh-i kitâbdan bir ay mukaddem tarafeyden îcâb ve kabûlü hâvî bi-tarîkı’l-istiğlâl merkūm Molla İsmail’e bi-safkatin vâhidetin altı yüz guruşa bey‘ ve her birini mahallerinde kabz ve tasarrufa tarafımdan taslît eylediğimde ol dahi ber-vech-i muharrer iştirâ ve kabûl edip semen-i mebî‘ altı yüz guruşu merkūm Molla İsmail’in yedinden bi’t-tamâm ve’l-kemâl ahz u kabz eylediğimden sonra merkūm Molla İsmail emlâk-i muharrere-i mezkûreyi gıbbe’t-tahliyeti’ş-şer‘iyye ve’t-takābüzu’l-mer‘î târîh-i kitâbdan bir sene tamâmına değin bana yüz guruşa îcâr ettikde ben dahi ber-minvâl-i meşrûh istîcâr ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer Zilhicceti’ş-şerîfe sene 1152. Şuhûdü’l-hâl: Derviş Ali Efendi b. Abdülhalim, Mehmed Efendi b. Mustafa, İsmail Efendi b. el-Hâc Mehmed, Hasan b. Abdullah