Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 308 Hüküm no: 442 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mansur’un kölesini kitâbet yoluyla azat ettiği Mahmiye-i İstanbul’da Eski Yusuf hanında sâkin tüccârdan el-Hâc Mansur b. Salih tarafından husûs-ı âti’l-beyânı ikrâra vekîl [ve] vekâleti hasm-ı câhid-i şer‘î mahzarında Mesud b. Mansur ve Yahya b. Süleyman şehâdetleriyle şer‘an sâbite olan Said b. Merzuk nâm kimesne mahfil-i kazâda müvekkil-i mezbûr için rıkkına mu‘terif olan uzun boylu, elâ gözlü, açık kaşlı, alt çenesinde top yarası olan Efrenciyyü’l-asl râfi‘-i hâze’l-kitâb Nikola v. Marine muvâcehesinde bi’l-vekâle ikrâr ve takrîr-i kelâm edip müvekkil-i mezbûr el-Hâc Mansur abd-i memlûkü mevsûf-ı mezbûr Nikola’yı iki yüz kırk kıt‘a riyâlî guruşa kitâbete kesip mevsûf-ı mezbûr dahi kitâbet-i mezbûreyi kabûl eylemiş idi. Hâlâ bedel-i kitâbet olan meblağ-ı mezbûr iki yüz kırk kıt‘a riyâlî guruşu müvekkil-i mezbûr el-Hâc Mansur mevsûf-ı merkūm Nikola yedinden bi’t-tamam ve’l-kemâl ahz u kabz eyledi, ba‘de’l-yevm mevsûf-ı mezbûr Nikola sair ahrâr-ı asliyyîn gibi hür olup üzerinde müvekkil-i merkūm el-Hâc Mansur’un velâdan gayrı alâkası kalmadı dedikde gıbbe’t-tasdîkı’l-mu‘teber mâ-vaka‘a bi’t-taleb ketb ü terkīm ve mevsûf-ı mezbûrun yedine def‘ ve teslîm olundu. Tahrîren fi’l-yevmi’t-tâsi‘ min-Şevvâli’l-mükerrem li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Ahmed Çelebi b. Hüseyin, Rıdvan b. Abdullah, Mehmed b. Osman ve gayruhum mine’l-huzzâr.