Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 88 Hüküm no: 25 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın evini Ali Efendi’ye sattığı Mahmiye-i İstanbul’da Edirnekapısı kurbünde Hadîce Sultan mahallesi ahâlîsinden fahrü’l-kuzâti’l-kirâm Ferâizzâde Mehmed Hamdullah Efendi b. el-merhûm el-Hâc Ali Efendi tarafından bey‘-i âti’z-zikre vekîl olduğu mahalle-i mezbûre müezzini es-Seyyid Ahmed Halîfe b. es-Seyyid Mehmed ve Ebubekir Efendi b. İbrahim nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan fahrü’l-eşbâh Ahmed Ağa b. Hasan Ağa meclis-i şer‘-i hatîr-ı lâzımü’t-tevkīrde sâhibü’l-kitâb Ali Efendi b. Abdullah muvâcehesinde bi’l-vekâle ikrâr-ı tâm ve takrîr-i kelâm edip akd-i âti’l-beyânın sudûruna değin müvekkilim mûmâ-ileyh Mehmed Hamdullah Efendi’nin yedinde mülk ve hakkı olup mahalle-i merkūmede vâki‘ bir tarafdan ba‘zan Ömer Odabaşı ve ba‘zan Süleyman Beşe ve ba‘zan Berber İsmail Çelebi mülkleri ve bir tarafdan müvekkilim mûmâ-ileyhin âhar mülkü ve bir tarafdan İpekçi Mustafa menzili ve bir tarafdan tarîk-i âm ile mahdûd hâriciyede iki bâb fevkānî oda ve bir sofa ve dehliz ve kenîf ve âbdesthâne ve tahtında bir bâb oda ve ahur ve kenîf ve bi’r-i mâ ve havlu ve dâhiliyede üç bâb oda ve iki sofa ve dehliz ve tahte’s-semâ ve kenîf ve âbdesthâne ve tahtında bir bâb oda ve bir kilâr ve bir hamam ma‘a câmekân ve bir matbah ve mahtab ve kenîf ve havlu ve hâricen etrâf-ı erba‘ası taş duvarı müştemil mülk menzilini cemî‘ tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Ali Efendi’ye vekâletim hasebiyle bin yedi yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve kabz ve tesellüm ve kabûl eylediğinden sonra semeni olan meblağ-ı mersûm bin yedi yüz guruşu merkūm Ali Efendi yedinden vekâlet-i mahkiyem sebebiyle tamâmen ahz u kabz edip menzil-i mahdûd-ı mezkûrun tağrîr ve gabnine müte‘allıka âmme-i da‘vâdan merkūm Ali Efendi’nin zimmetini bi’l-vekâle ibrâ ve ıskāt eyledi ba‘de’l-yevm menzil-i mahdûd-ı mezkûr alâ mâ yeştemilühû ve yahvîhi merkūm Ali Efendi’nin mülk-i müşterâsı ve hakk-ı sırfı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe sene 1152. Şuhûdü’l-hâl: es-Seyyid Mehmed Ma‘sum Efendi, İmâm el-Hâc İsmail Efendi b. Mehmed, Müezzin es-Seyyid Ahmed b. Mehmed, Ebubekir Efendi b. İbrahim, Ali Çavuş b. Hacı Ahmed, el-Hâc Mehmed b. İbrahim, Pehlivanzâde Mustafa Çelebi, Hüseyin Çelebi b. Şa‘bân, Yakub Beşe b. Abdullah, Mustafa Çelebi b. Osman, Mehmed Çelebi b. Abdullah, Arif Mehmed Çavuş b. Mehmed Çavuş, Mehmed Çavuş b. Halil