Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 89 Hüküm no: 26 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Ağa’nın elinde bulunan Nemçe asıllı İvaz’ın Ahmed Ağa’ya ait olduğu İstihkāk-ı abd Mahmiye-i İstanbul’da Küçükpazar kurbünde Hoca Hayreddin mahallesinde sâkin es-Seyyid Ahmed Ağa b. Mustafa nâm kimesne meclis-i şer‘-i şerîf-i enverde Ebubekir Efendi b. Osman b. Ebubekir nâm kimesne tarafından husûs-ı âti’l-beyânda vekîl olduğu Ali Ağa b. Hacı İsmail ve Ömer Çelebi b. Ahmed şehâdetleriyle sâbit olan Ahmed Çelebi b. diğer Mustafa mahzarında üzerine da‘vâ ve takrîr-i kelâm edip işbu hâzır bi’l-meclis Nemçiyyetü’l-asl abd-ı memlûküm İvaz nâm şâbb-ı emred târîh-i kitâbdan altı ay mukaddem mülkümden ibâk edip hâlâ müvekkil-i mezbûrun yedinde olmağın bi’l-istihkāk taleb ederim suâl olunup merkūm İvaz’dan kasr-ı yedine ve bana teslîme vekîl-i mezbûra tenbîh olunmak matlûbumdur dedikde gıbbe’s-suâl vekîl-i mezbûr Ahmed Çelebi cevâbında müvekkil-i mezbûr Ebubekir Ağa merkūm İvaz’ı târîh-i kitâbdan beş ay mukaddem gāib ani’l-meclis İbrail nâzırı Ahmed Ağa’dan iki yüz guruşa iştirâ etmekle mülk-i müşterâsı olmak üzere vaz‘-ı yed eder deyü müvekkil-i mezbûrun vaz‘-ı yedini ikrâr ve müdde‘î-i mezbûr es-Seyyid Ahmed Ağa’nın mülkü olduğunu inkâr edicek müdde‘î-i mezbûrdan müdde‘âsına mutâbık beyyine taleb olundukda udûl-ı ahrâr-ı ricâl-i Müslimîn’den ve mahmiye-i mezbûrede Dergâh-ı âlî yeniçerilerinin altmış bölüğe mahsûs oda neferâtından olup oda-i mezkûrede sâkin Süleyman Beşe b. Mehmed ve yine mahmiye-i mezbûrede Kıztaşı mahallesinde sâkin Ömer Beşe b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu Nemçiyyetü’l-asl İvaz müdde‘î-i mezbûr es-Seyyid Ahmed Ağa’nın abd-ı memlûkü olduğu halde târîh-i kitâbdan altı ay mukaddem mülkünden ibâk etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle oldukdan sonra mezbûr es-Seyyid Ahmed Ağa abd-ı merkūmu âhara bey‘ veyâ hîbe etmediğine veyâhûd tarîk-i [turuk-ı] şer‘iyyeden bir tarîk ile mülkünden ihrâc etmediğine yemîn teklîf olundukda ol dahi hasebi’l-mesûl yemîn billâhi’l-aliyyi’l-a‘lâ etmeğin mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicceti’ş-şerîfe sene 1152. Şuhûdü’l-hâl: Süleyman Beşe b. Mehmed, Ömer Beşe b. Ahmed, Ali Ağa b. Hacı İsmail, Mehmed Çelebi b. Abdullah