Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 91 Hüküm no: 28 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un evini Hasan Ağa’ya sattığı Mübâya‘a Mahmiye-i İstanbul’da Baba Hasan Alemî mahallesinde sâkine ve zâtı zeyl-i vesîkada isimleri mastûr el-Hâc İsmail Çelebi b. Cafer ve Mustafa Çelebi b. İbrahim nâm kimesneler ta‘rîfleriyle mu‘arrefe olan Âişe bt. Abdullah nâm hatun meclis-i şer‘-i şerîf-i enver ve mahfil-i dîn-i münîf-i ezherde sâbık mesned-tırâz-ı sadr-ı Rum olan imâm-ı evvel-i hazret-i şehriyârî a‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘ü’l-fezâil ve’l-me‘âlî metbû‘ü’l-efâzıl ve’l-e‘âlî alemü’l-ilmi ve’l-hüdâ menârü’l-fazli ve’t-tekā devletlü inâyetli âtıfetli kerâmetli Pîrîzâde Mehmed Efendi hazretlerinin hizmet-i şerîfleriyle şeref-yâb olan sâhib-i hâzihi’l-vesîka fahrü’l-emâsil ve’l-akrân Hasan Ağa b. Ali mahzarında ikrâr-ı tâm ve takrîr-i kelâm edip zikri âtî akdin sudûruna değin yedimde mülk ve hakkım olup zikr olunan Baba Hasan Alemî mahallesinde vâki‘ bir tarafı Abacı el-Hâc Mehmed ve bir tarafı Yağlıkçı Mehmed Çelebi ve bir tarafı Peştemâlci Mustafa Çelebi mülkleri ve taraf-ı râbi‘i tarîk-i âm ile mahdûd fevkānî bir bâb oda ve bir sofa ve tahtânî bir bâb oda ve bir sofa ve bir matbah ve kenîf ve bi’r-i mâ ve bir mikdâr havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Hasan Ağa’ya beş yüz guruşa bey‘ ve temlîk ve teslîm eylediğimde ol dahi ber-vech-i mübeyyen iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr beş yüz guruşu merkūm Hasan Ağa yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûr alâ-mâ yeştemilühû ve yahvîhi merkūm Hasan Ağa’nın mülk-i müşterâsı ve hakk-ı sırfı olup benim kat‘an alâka ve medhalim kalmamışdır keyfe mâ yeşâ’ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilhicceti’ş-şerîfe sene 1152. Şuhûdü’l-hâl: Umdetü’l-kuzâti’l-kirâm Mehmed Efendi kethüdâ-yı hazret-i müşârün-ileyh, fahrü’l-kuzât Şehrî Mehmed Efendi b. Mustafa, fahrü’l-kuzât Hasan Efendi b. Muslihiddin, Osman Efendi b. Abdurrahman, Kahveci Mustafa b. Ali, Mustafa Çelebi b. İbrahim, İsmail b. Cafer, el-Hâc Mehmed b. Hacı Zekeriya, el-Hâc İbrahim b. Abdurrahman, es-Seyyid Ali Çelebi b. Abdullah, Çukadâr Baba Yusuf b. Abdullah, Ahmed Efendi b. Lutfullah