Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 92 Hüküm no: 29 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Odabaşı’nın kızı Fatıma’ya kalan vakıf evin satılmasına izin verildiği Bey‘a izin Mahmiye-i İstanbul’da Beyceğiz mahallesinde sâkin iken bundan akdem vefât eden Ali Odabaşı b. Mehmed b. Ahmed’in sulbiye sagīre kızı Fâtıma’nın anası ve tesviye-i emrine kıbel-i şer‘den mansûbe vasîsi olan bâ‘isetü’l-vesîka Âişe bt. Abdullah nâm hatun meclis-i şer‘-i şerîf-i enverde takrîr-i kelâm ve bast-ı merâm edip defterdâr-ı sâbık İbrahim Efendi nâm sâhibü’l-hayrın vakfından bi’l-icâreteyn müteveffâ-yı mezbûrun hayâtında tasarrufunda olup mahalle-i mezbûrede vâki‘ bir tarafdan vakf-ı mezbûrdan müteehhilîn odaları ve bir tarafdan Bâzergân Hüseyin Çelebi Mescidi ve medresesi ve bir tarafdan yine vakf-ı mezbûrdan Rukiye Hatun mutasarrıfa olduğu menzil ve bir tarafdan ba‘zan yine vakf-ı mezbûrdan Soğancı el-Hâc Oruc evlâdları tasarrufunda olan menzil ve ba‘zan Solakbaşı el-Hâc Mustafa veresesi tasarrufunda olan menzil ile mahdûd ma‘lûmü’l-müştemilât vakıf menzil harâba müşrif olup ve sagīre-i mezbûrenin menzil-i mezkûrdan mâ‘adâ ism-i mâl ıtlâk olunur nesnesi olmayıp ve menzil-i mezbûru ta‘mîre dahi iktidârı olmamağla menzil-i mahdûd-ı mezbûr bedel-i misli ve ma‘rifet-i mütevellî ile âhara ferâğ ve bedeli istirbâh olunup ribhinden sagīre-i mezbûra infâk ve iksâ olunmak her vechile sagīre-i mezbûre hakkında evlâ ve enfa‘ olmağla hakīkat-i hâl işbu hâzırûn bi’l-meclis Müslimînden istîcâr olunup ber-vech-i muharrer ferâğa kıbel-i şer‘den izin verilmek bi’l-vesâye matlûbumdur dedikde hakīkat-i hâl mahalle-i mezbûre ahâlîlerinden olmalarıyla husûs-ı mezbûra vukūf-ı tâmları olup zeyl-i kitâbda muharrerü’l-esâmî Müslimînden istihbâr olundukda fi’l-hakīka hâl vasiye-i mezbûrenin bâlâda takrîr ve beyân eylediği vech üzere olduğu her biri ihbâr etmeleriyle mûcebince menzil-i mezbûru bedel-i misli ve ma‘rifet-i mütevellî ile âhara ferâğa vasiye-i mezbûre Âişe Hatun’a izin birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe sene 1152. Şuhûdü’l-hâl: Ali Efendi b. İbrahim el-imâm, es-Seyyid Selim Çelebi b. Hacı Mustafa, Halil Efendi b. İbrahim, Ali Çelebi b. Abdullah, Mehmed Çelebi b. Abdullah