Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 93 Hüküm no: 30 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazlı bt. Şahin’in evini Ümmügülsüm’e sattığı Mübâya‘a, bi-imzâ-i efendi Mahmiye-i İstanbul’da Sancakdâr Hayreddin mahallesinde mütemekkine olup zâtı ta‘rîfü’ş-şer‘î [ile mu‘arrefe] Nazlı bt. Şahin Nasrâniye meclis-i şer‘-i hatîr-ı lâzımü’t-tevkīrde işbu bâ‘isetü’l-kitâb Ümmügülsüm bt. Abdullah b. Abdurrahman nâm hatun tarafından husûs-ı âti’z-zikri tasdîka vekîl-i sâbitü’l-vekâlesi Kapıcılar Bölükbaşısı el-Hâc Mehmed Ağa b. Ali mahzarında ikrâr-ı tâm ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Ümmühani Hatun mülkü ve iki tarafdan Behram Ağa vakfı olan bahçe ve bir tarafdan tarîk-i âm ile mahdûd dâhiliyesinde üç fevkānî oda ve bir sofa ve bir matbah ve kenîf ve tahtında bir matbah ve kenîf ve bir mikdâr bahçe ve hâriciyesinde fevkānî iki bâb oda ve bir sofa ve tahtında kenîf ve bi’r-i mâ ve ahuru müştemil mülk menzilimi cemî‘ tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkile-i mezbûre Ümmügülsüm Hatun’a sekiz yüz elli guruşa bey‘ ü temlîk ve teslîm eylediğimde ol dahi ber-vech-i muharrer müvekkile-i mezbûre için bi’l-vekâle iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr sekiz yüz elli guruşu müvekkile-i mezbûre Ümmügülsüm Hatun yedinden tamâmen ve kâmilen ahz u kabz eyledim ba‘de’l-yevm menzil-i mahdûd-ı mezkûr müvekkile-i mezbûre Ümmügülsüm Hatun’un mülk-i müşterâsı ve hakk-ı sırfı olup benim kat‘â alâka ve medhalim kalmayıp keyfe mâ yeşâ’ ve yehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilhicce sene 1152. Şuhûdü’l-hâl: Halil Efendi el-imâm, Hazînedâr el-Hâc Mehmed Ağa, Mehmed Bey b. İbrahim, Attâr Mustafa Çelebi b. Abdullah, Keresteci Hacı Mustafa, Süleyman Ağa b. Selam Ağası, Veli Ağa b. (°), Muhzır İbrahim b. Ahmed, Muhzır Süleyman b. Mehmed