Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 93 Hüküm no: 31 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Basmacı esnafından Mavros’un ölümüyle gediğinin nizamları gereğince oğlu Mihail’e verilmesi Basmacıların hüccetidir Basmacı esnafının kethüdâları Mehmed Çelebi b. Ahmed ve yiğitbaşıları Ahmed b. Mehmed ve ustalarından el-Hâc Mehmed b. Mustafa ve es-Seyyid Abdi b. el-Hâc İsmail ve el-Hâc Murtaza b. Ahmed ve el-Hâc İbrahim b. Ahmed ve Abdi Beşe b. İbrahim ve Abdi b. Mehmed ve Molla Mustafa b. Mehmed nâm kimesneler ile esnaf-ı mezbûrenin zimmî ustalarından Bikos v. Kivork ve Ferhad v. Serkiz ve İsayi v. Panos ve Aleksan [v.] Mavros ve Arakir v. Mavros ve Mıgırdıç v. Ermiye ve Haçador v. Ermiye ve Nazar v. Bedroş ve Bedik v. Avanes ve Kabril v. Mikail ve sâir meclis-i şer‘-i hatîr-ı lâzımü’t-tevkīrde her biri takrîr-i kelâm ve ta‘bîr ani’l-merâm edip yedimizde olan hüccetlerde tahrîr olunduğu üzere san‘atımız erbâbı Müslim ve zimmî yüz nefer hissedâr olup ziyâde ve noksân olmayıp hissedâr ustalardan biri fevt olup tasarrufunda olan hissesi mahlûl oldukda san‘atında mâhir eski ustalardan birine verilmek üzere mukaddem nizâmımız olup lâkin nizâmda dâhil olan ustanın san‘at-ı mezbûrda evlâdı kaldıkda hisse ve gediği evlâdına verilmediği halde gadr olduğu cümlemizin ma‘lûmu olmağla bundan akdem ittifâkımız ile fevt olanın hisse ve gediği san‘atımızda olan evlâdına verilip olmadığı halde kemâ-fi’l-evvel mülâzım halîfelerden birine verilmek üzere re’y olunmuş idi, el-hâletü hâzihi hissedâr ve gedik sâhibi ustalardan Mavros v. (°) nâm zimmî hâlik olmağın mutasarrıf olduğu gediği ve hissesi müstahık olan evlâdı işbu bâ‘isü’l-vesîka Mihail nâm zimmîye ittifâkımız üzere cümle ihtiyârlarımız ma‘rifetiyle verilmekle kıbel-i şer‘-i enverden dahi vesîka verilmek murâdımızdır dediklerinde hıfzan li’l-makāl mâ-vaka‘a bi’t-taleb ketb. Fi’l-yevmi’l-hâmis aşer min-Zilhicceti’ş-şerîfe li-sene isnâ ve hamsîn ve mi’e ve elf. Şuhûdü’l-hâl: Du‘âcı Molla Hüseyin, Salih b. Süleyman, es-Seyyid Mustafa Ruhavî, Solak Mustafa, es-Seyyid Ali b. Mustafa