Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 94 Hüküm no: 32 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın nısf kantarcılık hissesini İbrahim Ağa’ya sattığı Kantarcıların [hüccetidir] Dârü’s-saltanati’l-aliyye Kostantıniyyetü’l-mahmiyede vâki‘ Gümrük-i âmirede hazîne-mânde eylediği kırk akçe ulûfesi mukābelesinde nısf kantarcılık hissesine bâ-berât-ı âlîşân mutasarrıf olan Ali Ağa b. Abdullah meclis-i şer‘-i hatîr-ı lâzımü’t-tevkīrde zikri mürûr eden kantarcılık nısf hisseye bâ-berât-ı âlîşân mutasarrıf olan sâhib-i hâze’l-kitâb fahrü’l-emâsil ve’l-akrân İbrahim Ağa b. el-Hâc Hüseyin Ağa mahzarında ikrâr-ı tâm ve takrîr-i kelâm edip zikri mesbûk nısf kantarcılık hissesi hazîne-mânde eylediğim kırk akçe ulûfesiyle ma‘an mûmâ-ileyh İbrahim Ağa’ya bin guruş bedel-i makbûz-ı müstehlek mukābelesinde ferâğ ve kasr-ı yed ve berât-ı âlîşânımı yedine def‘ ü teslîm eylediğimde mûmâ-ileyh dahi kabûl ve tesellüm ettikden sonra bedel-i müstehlek-i mersûm bin guruş mutâlebesine müte‘allıka âmme-i de‘âvî ve mutâlebât ve kâffe-i eymân ve muhâsamâtdan benim zimmetimi ibrâ-i âm ile ibrâ ve ıskāt ettikde ben dahi mârrü’z-zikr nısf kantarcılık hissesine ve hazîne-mânde olan kırk akçe ulûfeye müte‘allıka âmme-i de‘âvî ve mutâlebât ve kâffe-i eymân ve muhâsamâtdan mûmâ-ileyh İbrahim Ağa’nın zimmetini ibrâ-i âm ile ibrâ ve ıskāt eyledim ba‘de’l-yevm nısf kantarcılık mûmâ-ileyhin hakk-ı müfevvezi olmuşdur, emsâli gibi mutasarrıf olsun dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. 4 Zilhicce sene 1152. Şuhûdü’l-hâl: Süleyman Çelebi b. Abdullah, Mustafa Ağa b. el-Hâc Hasan, el-Hâc Mehmed Ağa b. Hasan, el-Hâc İsmail Ağa b. Mehmed, el-Hâc İbrahim Efendi b. Abdurrahman, Hasan Efendi b. Ömer, es-Seyyid Mehmed Efendi b. es-Seyyid Osman, İmâm Abdullah Efendi b. Hüseyin, İmâm Ahmed Efendi b. Ali