Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 95 Hüküm no: 33 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Mustafa Çelebi’nin Mehmed Efendi’den istiğlâl yoluyla borç aldığı İstiğlâl Mahmiye-i İstanbul’da Mahmud Paşa mahallesinde sâkin Esirci Mustafa Çelebi b. Hasan nâm kimesne meclis-i şer‘-i hatîrü lâzımü’t-tevkīrde umdetü’l-mevâli’l-izâm sâhibi hâze’l-kitâb sa‘âdetlü Mehmed Efendi b. Mustafa taraflarından husûs-ı âti’z-zikre vekîl olduğu Derviş Mehmed Ağa b. Mustafa ve es-Seyyid Mehmed Çelebi b. Mustafa şehâdetleriyle sâbit olan es-Seyyid Ahmed Efendi b. es-Seyyid Mehmed mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Vezir Hanı cidârı ve bir tarafdan arsa-i hâliye ve bir tarafdan Kalaycı Emir Çelebi menzili ve bir tarafdan tarîk-i âm ile mahdûd fevkānî ve tahtânî altı bâb oda ve bir kilâr ve bir matbah ve bir ahuru müştemil mülk menzilimi müşârün-ileyh Mehmed Efendi hazretlerine bi-tarîkı’l-istiğlâl bin guruşa bey‘ ü teslîm eylediğimde vekîl-i merkūm es-Seyyid Ahmed Efendi dahi bi’l-vekâle iştirâ ve tesellüm ve kabz ve kabûl eylediğinden sonra semeni olan meblağ-ı mezbûr bin guruşu vekîl-i merkūm Ahmed Efendi yedinden tamâmen ahz u kabz eylediğimden sonra vekîl-i mezbûr es-Seyyid Ahmed Efendi menzil-i mahdûd-ı mezkûru gıbbe’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan bir sene tamâmına değin beher mâh biner akçeye bi’l-vekâle bana îcâr ve teslîm ben dahi ber-vech-i muharrer istîcâr ve tesellüm ve kabz ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Zilhicce sene 1152. Şuhûdü’l-hâl: el-Hâc Mustafa Malatyalı, Molla Mustafa b. Ahmed, Ahmed Efendi Malatyalı, es-Seyyid Ali Efendi, Abdullah Efendi Kengirili, Abdullah b. Abdurrahman, Ahmed b. Abdullah