Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 95 Hüküm no: 34 Orijinal metin no: [6a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob’un İbrahim b. Mehmed’e borcu olduğu İkrâr-ı deyn Mahmiye-i İstanbul’da Süleymaniye Câmi‘-i şerîfi kurbünde Kâtib Şemseddin mahallesinde sâkin bâ‘is-i hâzihi’l-vesîka Dökmecibaşı el-Hâc İbrahim b. Mehmed nâm kimesne meclis-i şer‘-i hatîrü lâzımü’t-tevkīrde Agob v. Hacr nâm zimmî muvâcehesinde üzerine da‘vâ ve takrîr-i kelâm edip mesfûr Agob zimmetinde cihet-i karz-ı şer‘îden beş yüz guruş hakkım olmağla meblağ-ı mezbûr mukābelesinde merhûm el-Hâc Ömer Vakfı’ndan olup Tevkī‘î Cafer mahallesinde vâki‘ bir tarafdan Kuyumcu Avadik menzili ve bir tarafdan (°) menzili ve iki tarafdan tarîk-i âm ile mahdûd ma‘lûmü’l-müştemilât taht-ı tasarrufumda olan bir bâb vakıf menzilini bin yüz kırk dokuz senesi Rebî‘ülâhiri gurresinde bâ-ma‘rifet-i mütevellî rehin olmak üzere bana ferâğ etmekle ben dahi ba‘de’l-kabûl menzil-i mezkûru beher mâh beşer guruşa mersûm Agob zimmîye îcâr ve teslîm etmiş idim, hâlen cihet-i karzdan zimmetinde olan beş yüz guruş ile icâre-i mezkûreden bâkī yüz on guruş ki cem‘an altı yüz on dokuz guruşu mezbûr Agob zimmîden taleb ederim suâl olunup teslîme tenbîh olunması matlûbumdur dedikde gıbbe’s-suâl [6b] mezbûr Agob zimmî cevâbında fi’l-hakīka mezbûr el-Hâc İbrahim’e ber-vech-i muharrer cihet-i karzdan beş yüz guruş ve menzil icâresinden yüz on dokuz guruş ki min-haysü’l-mecmû‘ altı yüz on dokuz guruş deyni olduğunu ikrâr ve i‘tirâf etmeğin mûcebince meblağ-ı mezbûr altı yüz on dokuz guruşu müdde‘î-i mezbûr el-Hâc İbrahim’e edâ ve teslîme mesfûr Agob zimmîye tenbîh birle mâ-vaka‘a bi’t-taleb ketb olundu. Fi’l-yevmi’s-sânî min-Zilhicceti’ş-şerîfe sene 1152. Şuhûdü’l-hâl: el-Hâc Mustafa b. Hacı Mehmed, es-Seyyid Mustafa b. Hasan, Süleyman b. Mehmed, Molla Hüseyin Du‘âcı b. Mehmed