Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 308 Hüküm no: 443 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Ali Ağa’nın Urfa ve Birecik’in avarız ve bedel-i nüzûl vergilerini toplamak üzere vekili olan Hasan Bey’in elinde kalan paraları ödemesi Bundan akdem hâs bostancılar odabaşısı iken fevt olan Ali Ağa’nın ümm-i veledi Hadice’nin mezbûr Ali Ağa’nın firâşından zâhir ve mütebeyyin olan hamline ve sâir tesviye-i umûruna cânib-i şer‘den mansûb vasîsi olan işbu bâ‘isü’l-kitâb Ali Bey b. Mehmed mahfil-i kazâda hâssa bostancılardan Hasan Bey b. Mehmed mahzarında üzerine da‘vâ edip müteveffâ-i mezbûr alâ-hâli sıhhatinde vilâyet-i Anadolu’da Ruha ve Birecik kazâlarının târîh-i kitâb senesine mahsûb olmak üzere avârız ve bedel-i nüzûl hizmetlerini cânib-i mîrîden alıp ve cem‘ ve tahsîline mezbûr Hasan Bey’i tarafından tevkîl edip mezbûr dahi vekâlet-i merkūmeyi kabûl eyledikden sonra mezbûr Hasan Bey varıp zikrolunan kazâların avârız ve bedel-i nüzûl mallarını vekâleten cem‘ ve tahsîl edip iki yük doksan sekiz bin iki yüz akçe cem‘ ve tahsîl ve meblağ-ı mezbûru [65b] ahz u kabz eylemiş idi. Gelip müteveffâ-i mezbûr ile muhâsebesini görmezden mukaddem mezbûr Ali Ağa fevt olmağla zikr olunan hizmetlerden zimmetinde bâkī kalan iki yük otuz üç bin yedi yüz elli akçeyi mezbûr Hasan Bey’e mürâca‘at etmek üzere cânib-i mîrîden benim mâlımdan ahz u kabz etmişler idi. Ol mâldan mezbûr Hasan Bey yedinde bâkī kalan altmış dört bin dört yüz elli akçeyi taleb ederim, suâl olunsun dedikde gıbbe’s-suâl mezbûr Hasan Bey cevâbında fi’l-vâki‘ müteveffâ-i mezbûrun vech-i muharrer üzere vekîli olup varıp zikrolunan kazâların avârız ve bedel-i nüzûl mallarından iki yük doksan sekiz bin iki yüz akçe kabz eylediğini ve sebeb-i ma‘îşetini dahi tamamen kabz eylediğini ve müteveffâ-i mezbûrun zimmetinde bâkī kalan iki yük otuz üç bin yedi yüz elli akçeyi cânib-i mîrîden müdde‘î mezbûrdan ahz u kabz eylediklerini ikrâr u i‘tirâf edip lâkin müteveffâ-i mezbûra beni vekîl etmek için yirmi bir bin iki yüz elli akçe rüşvet vermişdim ol meblağı hesâb ederin deyicek mezbûr Ali Bey inkâr etmeğin merkūm Hasan Bey’den müteveffâ-i mezbûr ol vech üzere yirmi bir bin iki yüz elli akçe verdiğine beyyine taleb olundukda ikāmet-i beyyine için istimhâl etmeğin mehl-i şer‘î verilip andan mâ‘adâ ikrârı mûcebince yedinde bâkī kalan kırk üç bin iki yüz akçeyi müdde‘î-i mezbûr Ali Bey’e teslîm etmek üzere merkūm Hasan Bey’e tenbîh-birle mâ-vaka‘a gıbbe’t-taleb ketb olundu. Fi’l-yevmi’s-sâbi‘ min-Şevvâli’l-mükerrem li-sene erba‘a ve sittin ve elf. Şuhûdü’l-hâl: Hasan Bey b. Ali el-mübâşir, İbrahim Çelebi b. Davud, Ahmed Çelebi b. Hüseyin, Rıdvan b. Abdullah, el-Hâc Şa‘ban b. Ahmed ve gayruhum.