Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 96 Hüküm no: 35 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. İsmail’in eşi Ali’den muhâlaa yoluyla boşandığı Muhâla‘a Mahmiye-i İstanbul’da Hüsrev Paşa mahallesi sâkinelerinden olup zâtı es-Seyyid Mustafa b. es-Seyyid Hasan ve el-Hâc Mehmed b. Salih ta‘rîfleriyle mu‘arrefe olan Fâtıma bt. İsmail nâm hatun meclis-i şer‘-i hatîrü lâzımü’t-tevkīrde zevc-i dâhili işbu râfi‘ü’l-kitâb Ali b. Mehmed nâm kimesne mahzarında ikrâr-ı tâm ve takrîr-i kelâm edip mezbûr Ali zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Ali ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ-i âm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe sene 1152. Şuhûdü’l-hâl: es-Seyyid Mustafa b. Hasan, el-Hâc Mehmed b. Salih, el-Hâc Mustafa b. Mehmed, Molla Hüseyin du‘âcı