Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 97 Hüküm no: 36 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ömer’i boşayan Fazlı Beşe’nin hanımına mehrini ödemesi (bâyin) Hükm-i mehir Mahmiye-i İstanbul’da Altıay Çeşmesi kurbünde Debbâğzâde el-Hâc Hasan mahallesinde sâkine ve zâtı Molla Hüseyin b. Hacı Mehmed ve Hasan Çelebi b. İbrahim ta‘rîfleriyle mu‘arrefe olan işbu bâ‘isetü’l-vesîka Fâtıma bt. Ömer nâm hatun meclis-i şer‘-i hatîrü lâzımü’t-tevkīrde zevc-i sâbıkı Fazlı Beşe b. el-Hâc Ali mahzarında üzerine da‘vâ ve takrîr-i kelâm edip târîh-i vesîkadan yedi gün mukaddem mezbûr Fazlı Beşe beni bâyin-i talâk ile tatlîk eylediğinden mâ‘adâ iki def‘a dahi tatlîk edip üç def‘a zimmetinde mütekarrer ve ma‘kūdün-aleyh olan altı bin akçe mehr-i müeccelim ile nafaka-i iddet-i mu‘ayyene-i ma‘lûmem ve me’ûnet-i süknâmı mezbûr Fazlı Beşe’den taleb eylediğimde vermede mümâna‘at eder suâl olunup bana edâ ve teslîme mezbûr Fazlı Beşe’ye tenbîh olunmak murâdımdır dedikde gıbbe’s-suâl mezbûr Fazlı Beşe cevâbında müdde‘iye-i mezbûreyi vech-i muharrer üzere üç def‘a tatlîkini ve zimmetinde mütekarrer ve ma‘kūdün-aleyh bin akçe mehrini ikrâr mâ‘adâ beş bin akçe mehrini inkâr etmeğin ikrârı mertebesi olan bin akçe ile nafaka-i iddet-i mu‘ayyene-i ma‘lûme ve me’ûnet-i süknâsı için bi’t-terâzi ta‘yîn olunan üç yüz akçe ki cem‘an bin üç yüz akçeyi müdde‘iye-i mezbûre Fâtıma Hatun’a edâ ve teslîme mezbûr Fazlı Beşe’ye ba‘de’t-tenbîh müdde‘iye-i mezbûre Fâtıma Hatun ziyâde müdde‘âsı olan beş bin akçeyi beyâna havâle olmağın mâ-vaka‘a bi’t-taleb ketb olundu. Fî 13 Zilhicce sene 1152. Şuhûdü’l-hâl: Üsküdarî Ali Çelebi b. Abdullah, Abdülbaki Çelebi b. Ramazan, Molla Hüseyin du‘âcı, Hasan b. İbrahim