Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 97 Hüküm no: 37 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin evdeki yarım hissesini hanımı Ayşe’ye sattığı Mübâya‘a-i nısf menzil Mahmiye-i İstanbul’da Sancakdâr Hayreddin mahallesinde sâkin Abdullah Efendi b. Osman nâm kimesne meclis-i şer‘-i şerîf-i enverde sâhibetü hâzihi’l-vesîka zevcesi Âişe bt. Abdullah b. Abdullah nâm hatun tarafından husûs-ı âti’l-beyânda tasdîka vekîl-i sâbitü’l-vekâlesi Mehmed b. Mustafa mahzarında ikrâr-ı tâm ve takrîr-i kelâm edip yedimde mülküm olup mahalle-i mezbûrede vâki‘ bir tarafdan es-Seyyid Mustafa Efendi menzili ve bir tarafdan Şahbaz Paşa Vakfı’ndan olan menzil ve bir tarafdan Berber Hüseyin menzili ve bir tarafdan tarîk-i âm ile mahdûd fevkānî üç bâb oda ve bir sofa ve tahtında bir bâb oda ve bir matbah ve bi’r-i mâ ve kenîf ve bir mikdâr bahçeyi müştemil menzilimin nısf-ı şâyi‘ini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık bey‘-i bâtt-ı sahîh-i şer‘î ile yetmiş guruşa zevcem müvekkile-i mezbûre Âişe’ye bey‘ ve teslîm eylediğimde ol dahi iştirâ ve tesellüm ve kabûl eylediğinden sonra semeni olan meblağ-ı mezbûr yetmiş guruşdan mezbûre Âişe’nin zimmetini ibrâ ve ıskāt eyledim ba‘de’l-yevm menzil-i mahdûd-ı mezkûrun nısf-ı şâyi‘i zevcem müvekkile-i mezbûre Âişe’nin mülk-i müşterâsı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe sene 1152. Şuhûdü’l-hâl: İmâm-ı mahalle Mehmed Efendi, Müezzin Mehmed b. Salih, Mehmed Ağa b. Abdullah, Kethüdâ Halil Ağa, Berber Hasan Çelebi b. Mustafa, Molla Mustafa b. Mehmed, Osman Ağa b. Salih