Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 102 Hüküm no: 44 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Süleyman’ın, kız kardeşinin kızı Zeyneb’i Bostancı Hasan’ın köle diye sattığı yolundaki iddiasını ispatlayamadığı Mu‘ârazadan men‘ Mahmiye-i İstanbul’da Haraccı Kara Mehmed mahallesinde sâkin Mehmed b. Süleyman nâm kimesne meclis-i şer‘-i hatîr-ı lâzımü’t-tevkīrde bâ‘isü’l-vesîka Bostancı Hasan b. Ali nâm kimesne muvâcehesinde üzerine da‘vâ ve takrîr-i kelâm edip mezbûr Hasan kız karındaşım Hadîce nâm müteveffiyenin kızı Zeyneb bt. Kasım nâm hürretü’l-asl sagīreyi bundan akdem ayardıp medîne-i Mısır’a getirdikde rakīkası olmak üzere âhara semen-i ma‘lûma bey‘ etmekle mezbûr Hasan[‘dan] suâl olunup mûcib-i şer‘îsi icrâ olunmak matlûbumdur dedikde gıbbe’l-istintâk ve akībe’l-inkâr müdde‘î-i merkūm ber-vech-i muharrer müdde‘âsını beyân için mehl-i şer‘î birle bi’d-defa‘ât imhâl olundukda her def‘ada müddet-i mehl tamâm olup bir vechile ityân-ı beyyineye kādir olmamağın müdde‘î-i merkūm Mehmed bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicce sene 1152. Şuhûdü’l-hâl: İmâm es-Seyyid Ali Efendi b. es-Seyyid Ahmed, İsmail Odabaşı b. İbrahim, Süleyman Çelebi b. Mustafa, Hüseyin Çelebi b. Ömer