Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 103 Hüküm no: 45 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşanmış olan Ayşe’nin karnındaki çocuğa nafaka takdiri Nafaka-i haml Mahmiye-i İstanbul’da Keçeciler mahallesinde sâkine ve zâtı bi’l-ma‘rifeti’ş-şer‘iyye ârifân Ahmed b. Mehmed ve Ahmed b. Ömer nâm kimesneler ta‘rîfleriyle mu‘arrefe olan sâhibet-i hâzihi’l-vesîka Âişe bt. İbrahim nâm hatun meclis-i şer‘-i şerîf-i enverde zevc-i sâbıkı Takyeci Osman Çelebi b. Ömer nâm kimesne mahzarında ikrâr-ı tâm ve takrîr-i kelâm edip hâl-i zevciyet beynimizde kāim iken mezbûr Osman Çelebi’nin firâşından hâsıl hâlâ hamlim olmağla vaz‘-ı haml ile iddetim münkazıye olunca nafaka ve sâir levâzım-ı zarûriyem için kıbel-i şer‘den mezbûr Osman Çelebi üzerine kadr-ı ma‘rûf meblağ farz ve takdîr olunmak matlûbumdur dedikde mezbûre Âişe’nin takrîr-i meşrûhu vâkı‘a mutâbık ve zikri âtî meblağ kadr-ı ma‘rûf olduğunu mezbûr Osman Çelebi ikrâr ve i‘tirâf etmeğin vaz‘-ı haml ile iddeti münkazıye oluncaya değin mezbûre Âişe’nin nafaka ve sâir levâzım-ı zarûriyesi için kıbel-i şer‘den mezbûr Osman Çelebi üzerine bi’t-terâzi işbu târîh-i vesîkadan yevmî yedişer akçe farz ve takdîr olunup meblağ-ı mefrûz-ı mezkûr yevmî yedişer akçeyi ber-vech-i muharrer nafaka ve sâir levâzım-ı zarûriyesine harc ü sarfa ve lede’l-hâce istidâneye ve vakt-i zaferde mezbûr Osman Çelebi üzerine rücû‘a mezbûre Âişe’ye izin verilip mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe sene 1152. Şuhûdü’l-hâl: Ahmed b. Mehmed, Ahmed b. Ömer, Salih Çelebi b. (°), Mehmed b. Abdullah, Ahmed Çelebi b. Mehmed