Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 103 Hüküm no: 46 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ebubekir’in vefat eden Ahmed Usta’nın varislerinden olduğu İsbât-ı verâset Vilâyet-i Anadolu’da Harput kazâsı mahallâtından Saray Hatun mahallesi ahâlîsinden olup mahmiye-i İstanbul’da Şekerciler Hanı’nda müsâfiren sâkin zikri âtî müteveffânın usûbet-i sebebiye cihetinden vârisi olduğunu iddi‘â eden bâ‘isü’l-kitâb el-Hâc Mehmed b. Hacı Ebubekir nâm kimesne meclis-i şer‘-i hatîr-ı lâzımü’t-tevkīrde İbrahim Çelebi b. Hasan nâm kimesne mahzarında üzerine da‘vâ ve takrîr-i kelâm edip vilâyet-i Rumeli’nde medîne-i Kili’de sâkin iken bundan esbak vefât eden el-Hâc Ahmed Usta’nın babası Ömer b. Abdullah babam mezbûr el-Hâc Ebubekir b. el-Hâc Mehmed b. Abdullah’ın abd-ı mu‘takı ve mezbûr el-Hâc Ahmed Usta’nın anası Âişe bt. Abdullah’ın anası Fâtıma bt. Abdullah kezâlik medîne-i mezbûrede sâkineler zevce-i metrûkesine ve sulbiye kızına ve min-ciheti’l-velâ bana münhasıra olup bizlerden gayrı vâris ve terekesine müstahıkk-ı âharı olmamağın müteveffâ-yı mezbûr el-Hâc Ahmed Usta’nın merkūm İbrahim Çelebi zimmetinde cihet-i karz-ı şer‘îden yirmi guruş hakkı olup kable’l-ahz ve’l-istîfâ vefât etmekle meblağ-ı mezbûrdan hisse-i irsiyeme isâbet eden dokuz yüz akçe hakkımı merkūm İbrahim Çelebi’den taleb ettiğimde edâ ve teslîmden imtinâ‘ eder suâl olunup bana edâ ve teslîme merkūm İbrahim Çelebi’ye tenbîh olunmak bi’l-verâse murâdımdır gıbbe’s-suâl merkūm İbrahim Çelebi cevâbında fi’l-vâki‘ müteveffâ-yı mezbûra cihet-i mastûreden zimmetinde edâsı lâzım yirmi guruş deyni olduğunu ikrâr lâkin müdde‘î-i mezbûrun ber-vech-i muharrer verâsetini ma‘lûmum değildir deyü inkâr edicek müdde‘î-i mezbûr el-Hâc Mehmed’den ber-vech-i meşrûh verâsetine beyyine taleb olundukda udûl-ı ahrâr-ı ricâl-i Müslimînden ve kazâ-i mezbûrede sâlifü’z-zikr Saray Hatun mahallesi ahâlîsinden olup mahmiye-i mezkûrede Şekerciler Hanı’nda sâkinler Ahmed b. Mustafa ve Halil Beşe b. Osman nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka vilâyet-i Rumeli’nde medîne-i Kili’de sâkin iken bundan esbak vefât eden el-Hâc Ahmed Usta’nın babası mezbûr Ömer b. Abdullah müdde‘î-i mezbûr el-Hâc Mehmed’in babası merkūm el-Hâc Ebubekir b. el-Hâc Mehmed b. Abdullah’ın abd-ı mu‘takı ve mezbûr el-Hâc Ahmed Usta’nın anası Âişe bt. Abdullah’ın anası Fâtıma bt. Abdullah dahi kezâlik müdde‘î-i mezbûrun babası mezbûr el-Hâc Ebubekir’in câriye-i mu‘takası olup müteveffâ-yı mezbûr el-Hâc Ahmed Usta’nın verâseti medîne-i mezbûrede sâkineler zevce-i metrûkesine ve sulbiye kızına ve min-ciheti’l-velâ işbu müdde‘î-i mezbûr el-Hâc Mehmed’e münhasıradır bunlardan gayrı vârisi ve terekesine müstahıkk-ı âharı olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mezbûr el-Hâc Mehmed şer‘de merkūm İbrahim Çelebi muvâcehesinde ikrâr ve takrîr-i kelâm edip ânifen edâsına tenbîh olunan meblağ-ı mezbûr dokuz yüz akçeyi merkūm İbrahim Çelebi bana def‘ ü teslîm ben dahi ber-vech-i muharrer yedinden tamâmen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb [8a] ketb olundu. Fî 17 min-Zilhicceti’ş-şerîfe sene 1152. Şuhûdü’l-hâl: es-Seyyid el-Hâc Hüseyin Ağa b. es-Seyyid Mehmed, Abdullah Beşe b. Hasan, Hüseyin Beşe b. Mehmed, es-Seyyid Mustafa b. İbrahim, Osman Beşe b. Yusuf